نيو ڇور ٿاڻي جي حد ۾ سماجي اڳواڻ تي مبينا قاتلاڻو حملو، ڀاءُ حيدرآباد ريفر

ڳوٺ آهوري فارم وٽ مبينا حملي ۾ سماجي اڳواڻ جمشير عرف باغي سومرو ۽ سندس ڀاءُ واحد زخمي ٿي پيا

عمرڪوٽ (رپورٽ:ڪانجي مل رکيسر) نيو ڇور ٿاڻي جي حد ۾ ڳوٺ آهوري فارم وٽ انساني حقن جي تنظيم جي سماجي اڳواڻ جمشير عرف باغي سومرو ۽ سندس ڀاءُ واحد سومرو تي مبينا طور هٿياربند ماڻهن وحشياڻو حملو ڪري کين سخت تشدد جو نشانو بڻايو، جنهن جي نتيجي ۾ واحد سومرو کي دماغي ڌڪ لڳڻ سبب ڳڻتيءَ واري حالت ۾ سول اسپتال عمرڪوٽ مان حيدرآباد ريفر ڪيو ويو آهي، خبر موجب سماجي اڳواڻ جمشير سومرو صحافين سان ڳالهائيندي چيو ته جوابدار خان محمد ، محمد علي، عيسو ۽ لطيف پاتو راڄڙ شراب پي گار گند ڪري رهيا هئا، جنهن کان روڪڻ تي جوابدارن کيس ۽ سندس ڀاءُ واحد سومرو تي قاتلاڻو حملو ڪيو، تشدد ڪري رتورت ڪري ڇڏيو، سماجي اڳواڻ وڌيڪَ چيو ته هن واقعي کان چار ڏينهن اڳ ئي نيو ڇور ٿاڻي تي ايس ايڇ او کي جوابدارن خلاف لکت ۾ شڪايت ڏني هئي، پر پوليس طرفان ڪابه ڪارروائي نه ڪئي وئي، جنهن سبب جوابدارن جا حوصلا وڌي ويا ۽ آخرڪار اهڙو افسوسناڪ واقعو پيش آيو، واقعي کانپوءِ زخمين کي سول اسپتال عمرڪوٽ منتقل ڪيو ويو، جتي واحد سومرو جي حالت ڳڻتي جوڳي هئڻ سبب کيس حيدرآباد ريفر ڪيو ويو آهي، جمشير عرف باغي سومرو چيو آهي ته اسپتال مان فارغ ٿيڻ کانپوءِ هو جوابدارن خلاف نيو ڇور ٿاڻي تي واقعي جو ڪيس داخل ڪرائيندو ۽ اعليٰ اختيارين کان انصاف جي گهر ڪندو، علائقي ۾ واقعي کانپوءِ ڏهڪاءُ پکڙيل آهي، جڏهن ته سماجي حلقن پوليس جي لاپرواهي خلاف سخت ردعمل ظاهر ڪيو آهي.