گڏاپ ۽ ابراهيم حيدري ٽائون جي ڳوٺن ۾ گندگي ۽ گٽرن جي پاڻي جو آزار

رزاق آباد ،گهگهر،پپري،ڪوهي ڳوٺ، جوڳي موڙ ڪوڪڙي پاڙو، عمر مارئي ڳوٺ گندگي جي ور چڙهيل

ملير (رپورٽ: عبدالرشيد مورجھريو)گڏاپ ٽائون ۽ ابراهيم حيدري ٽائون جي رزاق آباد ،گهگهر،پپري،ڪوهي ڳوٺ، جوڳي موڙ ڪوڪڙي پاڙو، عمر مارئي ڳوٺ، موسي ڳوٺ،عبداللہ ڳوٺ سميت مختلف ڳوٺن ۾ سيوريج ۽ گندگي جو سنگين مسئلو شدت اختيار ڪري ويو آهي. ٽائون انتظاميا جي لاپرواهي سبب ڪيترن ئي ڳوٺن ۾ نالين جو پاڻي گهٽين ۽ رستن تي وهي رهيو آهي، جنهن ڪري علائقي واسين کي سخت اذيت کي منهن ڏيڻو پئجي رهيو آهي رهواسين جو چوڻ آهي ته سيوريج سسٽم مڪمل طور تي ناڪارا ٿي چڪو آهي، گهٽيون گندي پاڻي سان ڀرجي ويون آهن، جڏهن ته بدبو، مڇرن ۽ بيمارين جي وڌندڙ خطري سبب ٻار، عورتون ۽ پوڙها وڌيڪ متاثر ٿي رهيا آهن. ڪيترن علائقن ۾ اسڪول وڃڻ، روزگار ۽ آمدرفت به ڏکي بڻجي وئي آهي مقامي ماڻهن جو الزام آهي ته گڏاپ ٽائون ۽ ابراهيم حيدري ٽائون جون انتظاميا صرف ڪاغذي ڪارروائين ۽ فوٽو شوٽن تائين محدود آهن، جڏهن ته عملي طور تي مسئلن جي حل لاءِ سنجيده قدم ناهن کنيا ويا. بار بار شڪايتن ۽ درخواستن باوجود به ڪو به مستقل حل نظر نٿو اچي ڳوٺاڻن سخت احتجاج ڪندي خبردار ڪيو آهي ته جيڪڏهن فوري طور سيوريج سسٽم جي مرمت، نالين جي صفائي ۽ گندگي جي نيڪالي جو بندوبست نه ڪيو ويو ته هو ٽائون آفيسن ۽ مک شاهراهن تي احتجاجي مظاهرا ڪندا، جنهن جي مڪمل ذميواري لاڳاپيل ٽائون انتظاميا تي عائد ٿيندي رهواسين اعليٰ اختيارين، چونڊيل نمائندن ۽ لاڳاپيل کاتن کان مطالبو ڪيو آهي ته معاملي جو تڪڙو نوٽيس وٺي گڏاپ ۽ ابراهيم حيدري ٽائون جي ڳوٺن کي هن مستقل عذاب کان نجات ڏيارڻ لاءِ ترت ۽ عملي قدم کنيا وڃن.