مڪلي واسڻ سماجي اڳواڻ ناري جو امڙ سميت احتجاج

گهر تي غفور پليجي ۽ ٻين جي ٿيل قبضي جو عدالت ۾ ڪيس هلندڙ آهي: ماروي زنئور

ٺٽو(رپورٽ شفيق ڀٽي)مڪلي واسڻ سماجي تنظيم ۾ ڪم ڪندڙ ماروي زئنور پنهنجي بيواهه امڙ مريم زئنور سان گڏ اڄ پنهنجي دوست محمد حمائتي ڳوٺ مڪلي واري رهائشگاهه تي پريس ڪانفرنس ڪندي پوليس ۽ جانچ آفيسر تي سخت الزام مڙهيا آهن.پريس ڪانفرنس دوران ماروي زئنور چيو ته سندن گهر، جيڪو ڪجھ وقت اڳ ارشاد پليجو، ذوالقرنين پليجو، آفتاب هاشماڻي، غفور پليجو سميت ٻين ماڻهن طرفان قبضي هيٺ آندو ويو هو، ان بابت ڪيس هن وقت عدالت ۾ زيرِ سماعت آهي، پر افسوس سان چوڻو پوي ٿو ته ڪيس جو انويسٽيگيشن آفيسر جوابدار ڌر سان ملي ڀڳت ڪري رهيو آهي. هن الزام هنيو ته انويسٽيگيشن آفيسر هڪ طرفي ۽ بي بنياد جاچ ڪري سندن ڪيس کي سي ڪلاس ڪرائڻ جي ڪوشش ڪري رهيو آهي، جنهن خلاف هنن عدالت سڳوري ۾ پڻ درخواست داخل ڪرائي آهي.هن وڌيڪ چيو ته پوليس شروعات کان وٺي ساڻن ڪوبه سٺي نموني سان سهڪار نه ڪيو. جڏهن قبضي وارو معاملو ميڊيا ذريعي وائکو ٿي سامهون آيو ته پوليس مجبور ٿي پئي هئي ته بااثر قبضي ڪندڙ ڌر خلاف ڪيس داخل ڪري ۽ قبضي کان گهر خالي ڪرائي، جيڪو پوليس ان وقت ڪيو، پر جوابدار ڌر طرفان کنيل سامان، جنهن جو ذڪر ايف آءِ آر ۾ پڻ موجود آهي، اهو اڃا تائين واپس نه ڪرايو ويو آهي. کنيل سامان ۾ پنج تولن جا سونا زيور، موبائيل فون، ٻه لک روپيا نقد، ليپ ٽاپ ۽ ٻيو قيمتي سامان شامل آهي. ماروي زئنور الزام هنيو ته پوليس هاڻي جوابدار ڌر جي پاسي ٿي بيٺي آهي، جنهن بعد جوابدار کين ڪيس تان هٿ کڻڻ، جان کان مارڻ ۽ ٻيهر گهر تي قبضي جون سرعام ڌمڪيون ڏئي رهيا آهن. هن چيو ته هن سڄي معاملي ۾ هڪ درگاهه جو گادي نشين شامل آهي، جيڪو هر صورت ۾ سندن گهر تي قبضو ڪرڻ چاهي ٿو.هن وڌيڪ چيو ته جوابدار بااثر هجڻ ۽ هڪ گادي نشين جي سرپرستي حاصل هجڻ سبب ڊي سي سميت ڪنهن به وس وارن اختيارين وٽ سندن فرياد جو ڪو به اثر نٿو ٿئي. هن وڌيڪ الزام هڻندي چيو ته جوابدار پنهنجي اثر رسوخ استعمال ڪندي ڪوڙا ۽ هٿ ٺوڪيا ڪاغذ تيار ڪرايا آهن، جن تي سندس والد جون جعلي صحيون ڪيون ويون آهن، جيڪي هو ثابت ڪري سگهن ٿا. هن ٻڌايو ته هي پلاٽ 1991 کان سندن ملڪيت آهي ۽ 2008 کان هو اتي آباد آهن.پريس ڪانفرنس دوران ماروي زئنور ۽ سندس امڙ مريم زئنور صوبائي وزير حاجي علي حسن زرداري، رياض حسين شاهه شيرازي، صادق ميمڻ، گهرو وزير ضياءُ لنجار، ايس ايس پي ٺٽو سميت ٻين وس وارن کان مطالبو ڪيو ته جوابدار ڌر مان کين هاڻي جان جو خطرو آهي، هو ڪيس جي جانچ تي به اثرانداز ٿي رهيا آهن ۽ ڪنهن به وقت ٻيهر گهر تي قبضو ڪري سگهن ٿا. هنن چيو ته ايس ايڇ او سميت انويسٽيگيشن آفيسر جوابدارن جي پاسي ڌر ٿي بيٺل آهن، تنهن ڪري فوري طور ايماندار آفيسر مقرر ڪري کين انصاف ۽ تحفظ فراهم ڪيو وڃي، ٻي صورت ۾ هو روڊن تي نڪري احتجاج ڪرڻ تي مجبور ٿي ويندا.