سنڌ هاءِ ڪورٽ ميرپورخاص پاران ننڍي عمر جي ڇوڪرين کي دارالامان موڪلڻ غيرقانوني قرار

عدالت وڪيل ڀورا لعل ڀيل جي درخواست تي عمرڪوٽ ۾ چائلڊ پروٽيڪشن يونٽ قائم ڪرڻ جو حڪم ڏئي ڇڏيو

عمرڪوٽ (رپورٽ:ڪانجي مل رکيسر) ميرپورخاص هاءِ ڪورٽ ننڍي عمر جي ڇوڪرين جي تحفظ بابت هڪ اهم ۽ تاريخي فيصلو جاري ڪندي سنڌ حڪومت کي سخت هدايتون جاري ڪري ڇڏيون آهن، وڪيل ڀورا لعل ڀيل طرفان لالا ڀيل ذريعي داخل ڪيل پٽيشن ۾ مؤقف اختيار ڪيو ويو هو ته چائلڊ ميريج ريسٽرينٽ ايڪٽ 2013 تحت نابالغ ڇوڪرين کي دارالامان موڪلڻ غيرقانوني عمل آهي، ڇاڪاڻ⁠ تہ دارالامان جو ماحول بالغ عورتن لاءِ هوندو آهي، جيڪو ننڍي عمر جي ڇوڪرين لاءِ نه مناسب آهي ۽ نه ئي محفوظ، پٽيشن ۾ وڌيڪَ مؤقف اختيار ڪيو ويو ته عمرڪوٽ ۾ چائلڊ پروٽيڪشن يونٽ / شيلٽر هوم نه هجڻ سبب ننڍي عمر جون ڇوڪريون غلط طور دارالامان منتقل ڪيون وڃن ٿيون، جيڪو سندن حقن، تحفظ ۽ نفسياتي فلاح جي بنيادي اصولن جي ڀڃڪڙي آهي، ڊبل بينچ، جنهن جسٽس عدنان ڪريم ميمڻ ۽ جسٽس ريازت علي ساھڙ تي مشتمل هو، پٽيشن تي فيصلو جاري ڪندي چيف سيڪريٽري سنڌ کي حڪم ڏنو آهي ته ڇهن مهينن اندر عمرڪوٽ ۾ مڪمل فنڪشنل چائلڊ پروٽيڪشن يونٽ / شيلٽر هوم قائم ڪيو وڃي، نابالغ ڇوڪرين کي دارالامان موڪلڻ جو عمل فوري طور بند ڪيو وڃي، قانوني حلقن مطابق، هي فيصلو معصوم ڇوڪرين جي تحفظ لاءِ هڪ وڏو قدم آهي، جيڪو مستقبل ۾ اهڙي نوعيت جي غيرقانوني ڪاررواين کي روڪڻ جو سبب بڻجندو، عدالتي ڪارروائي دوران سول جج عمرڪوٽ محترم منير احمد جگسي پڻ مشابهت رکندڙ ريمارڪس ڏيندي ان مسئلي جي سنگيني تي روشني وڌي هئي، جنهن کي هاءِ ڪورٽ هاڻي عملي شڪل ڏئي ڇڏي آهي.