گڏاپ جي هندو پاڙي ۾ واپاري طرفان گهٽي تي مبينا قبضو

واپاري عام رستي جي وچ ۾ دڪان ٺاهي ڇڏيو آهي، نوٽيس ورتو وڃي: شهري

ملير (رپورٽ: عبدالرشيد مورجھريو) گڏاپ شهر جي هندو پاڙي ۾ بااثر واپاري طرفان گهٽي جي وچ ۾ دڪان ٺاهي عام رستو بند ڪرڻ تي علائقي واسين سخت احتجاج ڪيو آهي. شهرين جو چوڻ آهي ته واپاري شخص بنا ڪنهن قانوني اجازت ۽ نقشا منظور ڪرائڻ جي گهٽي تي قبضو ڪري دڪان تعمير ڪيو آهي، جنهن سبب پاڙي جا رهواسي ۽ گڏاپ جا شهري متاثر ٿيا آهن ۽ ماڻهن جي اچ وڃ مڪمل طور تي بند ٿي وئي آهي مقامي رهواسن موجب هن گهٽي ذريعي روزانو سوين ماڻهو پنهنجي گهرن، ڪاروبارن، اسڪولن ۽ عبادتگاهه ڏانهن ويندا هئا، جڏهن ته هاڻي رستو تنگ ٿيڻ ۽ بند ٿيڻ سبب بزرگن، عورتن، ٻارن ۽ بيمار ماڻهن کي شديد تڪليف کي منهن ڏيڻو پئجي رهيو آهي. شهرين جو چوڻ آهي ته ڪيترائي ڀيرا واپاري کي سمجهايو ويو ته گهٽي سرڪاري ملڪيت آهي ۽ ڪنهن به صورت ۾ ان تي قبضو برداشت نه ڪيو ويندو، احتجاج ڪندڙ شهرين الزام هنيو ته واپاري جي اثر رسوخ سبب پوليس ۽ مڪاني انتظاميا شڪايتن باوجود ڪو به قدم نه کنيو، جنهن ڪري علائقي ۾ ڪاوڙ ۽ بيچيني وڌي وئي آهي. احتجاج ڪندڙن ڊپٽي ڪمشنر ملير، گڏاپ جي اسسٽنٽ ڪمشنر ۽ مختيارڪار کان مطالبو ڪيو آهي ته هو فوري نوٽيس وٺي گهٽي تان ناجائز تعمير ختم ڪرائي رستو بحال ڪرائين