سعودي عرب ۾ به ثقافتي رنگ نروار، انڊس ڪلچر ۽ سوشل فورم پاران ثقافتي ميلو لڳايو ويو

غلام قادر ملاح جي ميزباني هيٺ شاندار سنڌي ثقافتي ميلو منعقد، علي گل ملاح ۽ ديبا سحر فن جو شاندار مظاهرو ڪيو

رياض (خصوصي رپورٽ )سعودي عرب ۾ به ثقافتي رنگ نروار، انڊس ڪلچر ۽ سوشل فورم پاران صدر غلام قادر ملاح جي ميزباني هيٺ شاندار سنڌي ثقافتي ميلو منعقد ڪيو ويو، جتي سنڌ جي ثقافت، موسيقي ۽ روايتي فنون جو خوبصورت ڏيک پيش ڪيو ويو۔ پروگرام ۾ مشهور فنڪار علي گل ملاح ۽ ديبا سحر پنهنجي فن جو شاندار مظاهرو ڪري شرڪت ڪندڙن جون دِليون موهي ڇڏيون،جڏهن ته هال سنڌي گيتن جي گونج سان مسلسل گونجندو رهيو۔تقريب ۾ آمريڪا مان مشهور سماجي ۽ ڪاروباري شخصيت شعيب ڀٽو، عاشق سمون، معراج سومرو، ڊاڪٽر نور جتوئي، حفيظ شيخ، ذيشان قاضي، زاهد ميان ڀٽو ۽ اقبال جهتيال سميت ٻين معزز شخصيتن پڻ شرڪت ڪري، سعودي عرب ۾ رهندڙ سنڌي ڪميونٽي لاءِ اهڙي ثقافتي سرگرمي جي ساراهه ڪئي۔پروگرام جي آرگنائيزر انڊس ڪلچر ۽ سوشل فورم جي صدر غلام قادر ملاح ۽ ٻين ڳالهائيندي چيو ته اهڙا پروگرام نه صرف اوورسيز سنڌين کي پنهنجي ڌرتي، تهذيب ۽ ثقافت سان جڙيل رکن ٿا، پر هڪ خوشگوار سماجي ماحول به مهيا ڪن ٿا۔