ملير: ابراهيم حيدري ٽائون جي ملازمن جي پگهارن مان مبينا ڪٽوتي

ماهوار پگهارن مان 12 هزار کان 18 هزار رپيا غير حاضريءَ جي نالي تي ڪٽيا وڃن ٿا: ملازم

ملير (رپورٽ: عبدالرشيد مورجھريو)ابراهيم حيدري ٽائون جي سوين ملازمن جي ماهوار پگهارن مان 12 هزار کان 18 هزار روپيا غير حاضريءَ جي نالي تي ڪٽوتي ڪرڻ سبب ملازمن ۾ سخت بيچيني ۽ ڪاوڙ پکڙجي وئي آهي جڏهن ته سپريم ڪورٽ پگهارن ڪٽڻ کي غيرقانوني قرار ڏنو آهي متاثر ملازم پريس ڪلب پهچي صحافين سان ڳالهائيندي پگهارن مان ڪٽوتي جو ليٽر ڏيکاريندي چيو ته هو وقت جي مڪمل پابندي سان پنهنجي ڊيوٽيون سرانجام ڏئي رهيا آهن، تنهن هوندي به کين بنا ڪنهن جائز سبب جي غير حاضر ظاهر ڪري اجرت مان وڏي ڪٽوتي ڪئي وئي آهي ملازمن جو چوڻ هو ته کين نه ته ڪو اڳواٽ نوٽيس ڏنو ويو آھي ۽ نه ئي غير حاضري بابت ڪو لکت ۾ ثبوت فراهم ڪيو ويو، جنهن ڪري هو پاڻ کي ناانصافي جو شڪار محسوس ڪري رهيا آهن هنن الزام لڳايو ته ڪوڙو جواز ڄاڻائي کين محنت جي پگهار کان محروم ڪيو پيو وڃي، جيڪا سراسر زيادتي آهي ٻئي طرف ٽائون انتظاميا سان رابطي ڪرڻ تي ٻڌايو ويو ته غير حاضر ملازمن خلاف قانوني ڪارروائي ڪئي وئي آهي، جڏهن ته ٽائون جي ميونسپل ڪمشنر اهڙي ڪنهن به ڪارروائي کان لاتعلقي ظاهر ڪندي چيو آهي ته پگهارن مان ڪٽوتي بابت کين ڪا ڄاڻ ناهي ملازمن مطالبو ڪيو آهي ته فوري طور پگهارن مان ڪٽوتي بند ڪئي وڃي ۽ معاملي جي شفاف جاچ ڪئي وڃي هنن خبردار ڪيو ته جيڪڏهن سندن جائز مطالبا تسليم نه ڪيا ويا ته هو مجبور ٿي ٽائون آفيس جو گهيراءُ ڪندا، جنهن جي ذميواري انتظاميا تي هوندي..