ايس ايس پي ٺٽو جي صدارت هيٺ ايس ايس پي آفيس ۾ اجلاس

پوليس جي ڪارڪردگي ۽ ڪاررواين جو تفصيلي جائزو ورتو ويو

ٺٽو (ڊ ر) ايس ايس پي ٺٽو فاروق احمد بجاراڻي جي صدارت هيٺ ايس ايس پي آفيس ٺٽو ۾ ضلعي جي سمورن پوليس آفيسرن سان هڪ اهم ميٽنگ منعقد ڪئي وئي.ميٽنگ ۾ ضلعي جي سمورن ايس ڊي پي اوز، ايس ايچ اوز، انچارج سي آءِ اي ٺٽو، پوليس پوسٽن جا انچارج، 15 مددگار بيس ٺٽو جا انچارج ۽ مختلف برانچز جا سربراهه شريڪ ٿيا.ميٽنگ دوران ضلعي ۾ مجموعي امن امان جي صورتحال، رپورٽڊ ۽ اڻ رپورٽڊ ٿيل ڏوهن، پوليس جي مجموعي ڪارڪردگي ۽ جاري ڪاررواين جو تفصيلي جائزو ورتو ويو.ايس ايس پي ٺٽو، آفيسرن کي هدايتون جاري ڪيون ته ضلعي ۾ ڏوهن تي ڪنٽرول کي وڌيڪ مؤثر بڻايو وڃي، جڏهن ته لسٽڊ عادي، اشتهاري ۽ انعام يافته جوابدارن جي گرفتاري لاءِ ڪاررواين ۾ تيزي آندي وڃي.هن هدايت ڪئي ته سنگين نوعيت جي ڪيسن ۾ ملوث اشتهاري، روپوش ۽ گهربل جوابدارن خلاف بنا دير سخت ۽ نتيجه خيز ڪارروايون ڪيون وڃن ته جيئن قانون جي بالادستي کي يقيني بڻائي سگهجي، ان سان گڏ سڀني گرفتار جوابدارن جو CRO وقت سر مڪمل ڪيو وڃي.ايس ايس پي ٺٽو آفيسرن کي هدايت ڪئي ته ڏوهاري عنصرن خلاف روزاني بنيادن تي سرچنگ ۽ ڪومبنگ آپريشنز کي يقيني بڻايو وڃي.وڌيڪ ٻڌايو ويو ته اسپيشل برانچ پاران تيار ڪيل منشيات فروشَن جي ڪيٽيگري وائز فهرستن (A+, A, B, C) جي روشني ۾ ضلعي اندر منشيات خلاف ڪارروايون وڌيڪ تيز ڪيون وڃن، خاص طور تي تعليمي ادارن ۽ انهن جي ڀرپاسي منشيات وڪرو ڪندڙن خلاف بنا امتياز سخت ڪارروائي تي زور ڏنو وڃي.ايس ايس پي ٺٽو پوليس پيٽرولنگ ۽ پڪٽنگ جي نظام کي وڌيڪ بهتر بڻائڻ ۽ ڊيوٽي دوران سموري عملي کي هاءِ الرٽ رهڻ جون به هدايتون جاري ڪيون.هن وڌيڪ چيو ته سمورن ٿاڻن ۽ پوليس آفيسن ۾ صفائي، نظم و ضبط ۽ ڊسيپلن کي بهتر بڻايو وڃي، جڏهن ته ٿاڻن ۾ ايندڙ شڪايت ڪندڙن سان خوش اخلاقي سان پيش اچي سندن مسئلا ترجيحي بنيادن تي حل ڪيا وڃن.آخر ۾ ايس ايس پي ٺٽو واضح ڪيو ته بهتر ڪارڪردگي ڏيکاريندڙ آفيسرن ۽ اهلڪارن کي تعريفي سرٽيفڪيٽ ۽ نقد انعام ڏنا ويندا، جڏهن ته غفلت يا ناقص ڪارڪردگي ڪندڙ عملي خلاف سخت محڪماڻي ڪارروائي ڪئي ويندي