گڏاپ سٽي جي مين مارڪيٽ ۾ چورين جو سلسلو رڪجي نه سگهيو، واپاري خوف ۾ ورتل

ملير (رپورٽ: عبدالرشيد مورجھريو)گڏاپ سٽي جي مين مارڪيٽ هڪ ڀيرو ٻيهر چورن جي وي چڙهي ويئي آهي جنهن سبب واپارين توڙي علائقي واسين ۾ سخت خوف ۽ بيچيني پيدا ٿي وئي آهي۔ تازي واردات ۾ موبائل فونن جي هڪ دڪان، جنهن جو مالڪ الٰهي بخش بلوچ ٻڌايو وڃي ٿو رات دير سان دڪان جا تالا ٽوڙي قيمتي موبائل فون، ڪيش رقم ۽ ٻيو سامان چوري ڪري فرار ٿي ويا۔ صبح جو دڪان کولڻ تي مالڪ کي چوريءَ جو پتو پيو، جنهن کان پوءِ سڄي مارڪيٽ ۾ ڪاوڙ ۽ ڳڻتي جي لهر پکڙجي وئي۔واضح رهي ته گڏاپ مين سٽي مارڪيٽ ۾ هن کان اڳ به ٻه ٽي وڏيون چوريون ٿي چڪيون آهن پر اڄ تائين انهن وارداتن ۾ ملوث جوابدارن کي قانون جي گرفت ۾ نه آندو ويو اهي ۔ جنهن ڪري پوليس جي ڪارڪردگي تي به سوال اٿڻ لڳا آهن۔متاثر واپاري الٰهي بخش بلوچ ۽ ٻين دڪاندارن جو چوڻ آهي ته بار بار ٿيندڙ چوريون رڳو سندن روزگار کي نقصان نه پيون پهچائين، پر سڄي علائقي جي امن امان ۽ حفاظتي نظام کي به خطري ۾ وجهي ڇڏيو آهي۔ هنن چيو ته جيڪڏهن فوري قدم نه کنيا ويا ته ڏوهاري عنصرن جا حوصلا وڌيڪ وڌي ويندا۔مارڪيٽ جي واپارين ۽ علائقي جي رهواسين لاڳاپيل پوليس اختيارين ۽ اعليٰ عملدارن کان مطالبو ڪيو آهي ته گڏاپ مين سٽي مارڪيٽ ۾ رات جو گشت وڌايو وڃي، سي سي ٽي وي ڪيمرائون لڳايون وڃن ۽ اڳ ۾ ٿيل چورين ۾ ملوث ماڻهن کي جلد گرفتار ڪري قانون موجب سزا ڏني وڃي،