وینزویلا پر حملے کا کوئی جواز نہیں تھا، اگر امریکہ انسان دوست ہے تو نیتن یاہو پر مقدمہ چلائے: خواجہ آصف

اسلام آباد (ویب ڈیسک) وفاقی وزیر دفاع خواجہ آصف نے کہا ہے کہ بھارت کے ساتھ جنگ میں ہمارے طیارے عملی طور پر ٹیسٹ ہو چکے ہیں، ہمیں اتنے آرڈرز مل رہے ہیں کہ ممکن ہے چھ ماہ بعد آئی ایم ایف کی بھی ضرورت نہ پڑے۔ نجی ٹی وی چینل کے ایک پروگرام میں گفتگو کرتے ہوئے خواجہ آصف نے کہا کہ ہم بھارت اور افغانستان کے ساتھ جنگ کے لیے تیار ہیں، اور مئی 2025 میں یہ بات ثابت بھی کر چکے ہیں۔ انہوں نے کہا کہ مئی 2025 کی جنگ کے بعد بھارت کا اعتماد بری طرح مجروح ہوا، بھارت کو شکست دینے کے بعد ہماری عزت میں اضافہ ہوا ہے، ہمارے طیارے کامیابی سے ٹیسٹ ہو چکے ہیں اور ہمیں بڑی تعداد میں آرڈرز مل رہے ہیں، جس کے باعث ممکن ہے مستقبل میں آئی ایم ایف کی ضرورت ہی نہ رہے۔ ان کا کہنا تھا کہ وینزویلا پر حملے کا کوئی جواز نہیں تھا، موجودہ عالمی نظام جو بھی تھوڑا بہت قائم ہے وہ تباہ ہو رہا ہے، نیتن یاہو اس وقت دنیا کا سب سے بڑا مطلوب مجرم ہے، اگر امریکہ واقعی انسانیت دوست ہے تو اسے نیتن یاہو کے خلاف کسی عدالت میں مقدمہ چلانا چاہیے۔