ٺٽي جي سونارا بازار ۾ دڪان مان ڪروڙين رپين جي چوري، واپارين جو احتجاج

اڻڄاتل چور سوناري حاجي يوسف جي دڪان کي کاٽ هڻي ڪروڙين رپين جي چوري ڪري فرار

ٺٽو(ڊر) مين صرافه بازار مان ڪروڙين روپين جي وڏي چوري، واپارين جو سخت احتجاج، مارڪيٽ بند ٺٽي جي مين صرافه بازار (سونار گلي) مان نامعلوم چور رات جي اونداهي ۾ ڪروڙين روپين جي ماليت جو سون ۽ نقد رقم کڻي فرار ٿي ويا. ڄاڻ موجب هڪ سوناري جي دڪان جي ڇت ٽوڙي، چور لڳ ڀڳ ٻه ڪروڙ روپين جو سون ۽ نقد رقم کڻي ويا، جڏهن ته واقعي وقت هڪ چوڪيدار ۽ پوليس اهلڪار جي موجودگي به ٻڌائي پئي وڃي. دڪان جي مالڪ سوناري حاجي يوسف ٻڌايو ته واردات رات دير سان ٿي، صبح جڏهن هن دڪان کوليو ته سڀ ڪجهه صاف ٿيل هو. هن چيو ته ايتري وڏي واردات باوجود پوليس طرفان ڪو به خاطرخواهه قدم نه کنيو ويو. واقعي خلاف واپاري برادري سخت احتجاج ڪندي سڄي مارڪيٽ بند ڪري ڇڏي. احتجاج دوران واپاري اڳواڻن ڪامران قريشي، حاجي يوسف، حاجي وسيم اختر ميمڻ ۽ ٻين چيو ته واپاري عدم تحفظ جو شڪار آهن ۽ روزانو ڦر ۽ چوري جون وارداتون وڌنديون پيون وڃن. هنن چتاءُ ڏنو ته جيڪڏهن 24 ڪلاڪن اندر چور گرفتار نه ڪيا ويا ۽ چوري ٿيل زيور برآمد نه ٿيو ته ٺٽو سميت پوري سنڌ ۾ سخت احتجاج ڪندي مارڪيٽون بند ڪيون وينديون