باڊھ ۾ ٽائون ڪاميٽي جي ملازمن طرفان پگھارن ۽ پيشنن مان ڪٽوتين خلاف احتجاج

ھر مھيني پگھارون ۽ پينشن مان ناجائز ڪٽوتي ڪري ماھوار ڪروڙين رپين جي ڪرپشن ڪئي پئي وڃي: ملازم

باڊھ (رپورٽر) باڊھ ۾ ٽائون ڪاميٽي ملازمن طرفان پگھارون ۽ پيشنن مان ناجائز ڪٽوتين ۽ انتقامي ڪارواين خلاف احتجاجي مظاھرو ڪيو ويو، ٽائون ملازمن عامر چانڊيو جي اڳواڻي ۾ ٽائون چيئرمين جي آفيس کان پراڻي ٽائون ھال تائين ھٿن ۾ بينر ۽ معصوم ٻچڙا کڻي پگھارن مان ڪٽوتين خلاف زوردار نعريبازي ڪئي وئي، ان موقعي تي ملازمن دانھيندي چيو ته ٽائون چيئرمين بدرالدين ساريو ۽ ٽائون آفيسر عمران علي سيال ھر مھيني ملازمن جي پگھارون ۽ پينشن مان ناجائز ڪٽوتي ڪري ماھوار ڪروڙين روپين جي ڪرپشن ڪري رھيا آھن، جڏھن ته 2012 ۾ ڀرتي ٿيل ملازمن جو پگھارون رڪارڊ تي موجود آھي پر اھي پئسا ملازمن کي نٿا ملن، ڪيترن ئي ملازمن خلاف انتقامي ڪاروائي ڪري سندن پگھارون ۽ پينشن روڪيو ويون آھن، ملازمن چيو ته ٽائون چيئرمين اختيارن جو ناجائز استعمال ڪندي 340 ملازم ھجڻ باوجود 66 ڪچا ملازم ڀرتي ڪيا آھن ۽ 8 ملازم ڊيپوٽيشن تي رکرايا ويا آھن، جيڪي ٽائون جي خزاني تي اضافي بار وڌو ويو آھي، اڳ ئي 2012 جي ڀرتي ٿيل ملازمن جون پگھارون جاري نه ٿيون ٿين، ماھوار ڪروڙين روپين جي ڪرپشن ۾ ملوث چيئرمين ۽ ٽائون آفيسر خلاف قانوني ڪاروائي ڪئي وڃي، ملازمن وزيراعلي سنڌ سيد مراد علي شاھه، بلديات کاتي جي صوبائي وزير سيد ناصر حسين شاھه، سيڪريٽري لوڪل گورنمينٽ سنڌ ۽ ڊپٽي ڪمشنر لاڙڪاڻو کان مطالبو ڪيو آھي ته ٽائون ڪاميٽي باڊھه جي ملازمن کي فل پگھارون ۽ پينشن جاري ڪري ساڻن انصاف ڪيو وڃي.