شايد سنڌ سميت ٻين صوبن کي ورهائڻ جي سازش ٿي رهي آهي: غلام مرتضيٰ جتوئي

اين ايف سي ايوارڊ، معدنيات ۽ ٻين اهم معاملن کي وفاق حوالي ڪرڻ جون ڳالهيون پڻ سامهون اچي رهيون آهن

نوشهروفيروز (ڊ ر)بلاول زرداري قتل ڪيس ۽ محبت ديرو ٿاڻي ۾ داخل ڪيسن جي ٻڌڻي عدالت پاران 19 نومبر تائين ملتوي ڪري ڇڏي ۔ ٻڌڻي کانپوءِ عدالت ٻاهران اڳوڻي وفاقي وزير ۽ جي ڊي اڳواڻ غلام مرتضیٰ جتوئي ميڊيا سان ڳالهائيندي چيو ته اڃان تائين واضع ناهي ته 27 هين آئيني ترميم ۾ آخر ڇا آڻين پيا سندس چوڻ هو ته خدشا موجود آهن ته شايد سنڌ سميت ٻين صوبن کي ورهائڻ جي سازش ٿي رهي آهي مرتضیٰ جتوئي وڌيڪ چيو ته اين ايف سي ايوارڊ، معدنيات ۽ ٻين اهم معاملن کي وفاق حوالي ڪرڻ جون ڳالهيون پڻ سامهون اچي رهيون آهن، جيڪي سنڌ جي حقن خلاف آهن هن چيو ته سنڌ ۾ ترقياتي ڪمن لاءِ ايندڙ پنجاهه سيڪڙو پئسا کائي ڇڏين ٿا، جنهن ڪري اهڙي سوچ پيدا ٿي آهي. 27ترميم وارو بل پيپلز پارٽي لاءِ وڏو امتحان آهي ته اڳتي هو ڇا رستو اختيار ڪن ٿا غلام مرتضیٰ جتوئي چيو ته پنجاب ۾ به ڪرپشن آهي پر سنڌ ۾ اها حد کان وڌيڪ وڌي وئي آهي مسٽر زرداري ‘ٽن پرسنٽ جي نالي سان مشهور ٿيو هو، پر هاڻي حالتون ان کان به بدتر آهن هن چيو ته پنجاب ۽ سنڌ جي ترقياتي ڪمن ۾ وڏو فرق آهي جيڪو هر ڪنهن کي واضع نظر اچي ٿو. سندس تجويز هئي ته جيڪڏهن ڪرپشن ختم نٿي ٿي سگهي ته گهٽ ۾ گهٽ ڏهه سيڪڙو ليگل ڪئي وڃي جيئن ڪم ته بهتر ٿي سگهن هن وڌيڪ چيو ته پوليس هٿان نوجوانن جي کنڀجڻ جا واقعا وڌي ويا آهن جنهن ڪري سنڌ پوليس اسٽيٽ بڻجي وئي آهي. اسان جا جتوئي ڇوڪرا به جڏهن نڪرن ٿا ته پوليس بنا سبب ٻين ڪيسن ۾ کڻي وڃي ٿي غلام مرتضیٰ جتوئي چيو ته سنڌ سان اهڙيون زيادتيون ٿي رهيون آهن جيڪي ترخانن ۽ ارغونن جي دور ۾ به نه ٿيون. اڄ به سنڌ جي وسيلن تي قبضا ڪيا پيا وڃن آخر ۾ هن طنزيه انداز ۾ چيو ته مون کي خبر ئي ناهي ته سنڌ جو گهرو وزير ڪير آهي؟ ڇا توهان اهڙي شخص کان رواداري جي اميد رکو ٿا جنهن کي رواداري جي اي بي سي تائين جي به خبر ناهي