ملير: گلشن حديد ۾ جمعيت علماءَ اسلام جي پاڻي کوٽ ۽ بدامني خلاف ريلي

هڪ پاسي ملير بدامني جي باهه ۾ سڙهي رهيو آهي ته ٻي پاسي مختلف علائقن کي پاڻي جي فراهمي بند آهي: اڳواڻ

ملير (رپورٽ: عبدالرشيد مورجھريو) جمعيت علماءَ اسلام گڏاپ ٽائون ملير طرفان انتظاميا جي نااهلي ۽ عوامي مسئلن خلاف گلشن جديد ۾ الخدمت اسپتال فيز ٽو کان الله واري چورنگي فيز ون تائين وڏي احتجاجي ريلي ڪڍي وئي جنهن ۾ سوين ڪارڪنن ۽ شهرين وڏي انگ ۾ شرڪت ڪئي ريلي جي اڳواڻي جمعيت علماءَ اسلام گڏاپ ٽائون جي امير مولانا عبدالقيوم صديقي، امير مولانا عبدالماجد چاچڙ، جنرل سيڪريٽري قاري ثناءُالله عثماني، مفتي مبشر، مولانا قاري محمد احسن، جنرل سيڪريٽري مولانا احسان الله، مولانا ولي الله هزاروي ۽ مفتي عبدالشکور ڪئي۔ ريلي ۾ شرڪت ڪندڙ بينر ۽ پلي ڪارڊ کڻي ڏوھ ختم ڪريو پاڻي جي کوٽ ختم ڪريو جا نعرا هڻندا رهيا ريلي جڏهن الله واري چوڪ پهتي ته وڏي جلسي ۾ تبديل ٿي وئي۔ ان موقعي تي اڳواڻن خطاب ڪندي چيو ته هڪ پاسي سڄو ملير بدامني جي باهه ۾ سڙهي رهيو آهي، ته ٻئي پاسي ملير جون آبادين، خاص طور تي گلشن حديد، گهگھر پپري، گڏاپ ۽ ڀرپاسي جا علائقا سالن کان ترقياتي ڪم کان محروم آهن۔ لکين جي آبادي پاڻي، صفائي، سيوريج، روڊن ۽ صحت جي بنيادي سهولتن کان وانجهيل آهي، جڏهن⁠ته مقامي انتظاميا مڪمل طور تي ناڪام ٿي چڪي آهي اڳواڻن وڌيڪ چيو ته قبرستانن، اسپتالن ۽ تعليمي ادارن جي خستہ حالي سبب شهري سخت پريشاني ۾ مبتلا آهن، ۽ انتظاميا جي مسلسل غفلت سبب عوام ۾ بيچيني وڌي رهي آهي۔ قاري حمدالله حقاني چيو ته جيڪڏهن عوامي مسئلا جلد حل نه ڪيا ويا ته احتجاجي تحريڪ جو دائرو وڌيڪ وسيع ڪيو ويندو۔ اڳواڻن سنڌ حڪومت ۽ ضلعي انتظاميا کان مطالبو ڪيو ته گڏاپ ٽائون جي عوام کي فوري طور بنيادي سهولتون فراهم ڪيون وڃن ۽ ترقياتي منصوبن تي عملدرآمد شروع ڪيو وڃي۔