ملير:شاه لطيف پوليس جي وڏي ڪارروائي، فحاشي ۾ ملوث گروهه بي نقاب

غريب عورتن کي لالچ ڏئي فحاشي تي مجبور ڪندڙ نيٽورڪ پڪڙجي ويو: پوليس

ملير (رپورٽ: عبدالرشيد مورجھريو) شاه لطيف پوليس ڳجهي اطلاع تي ڪارروائي ڪندي فحاشي جي ڌنڌي ۾ ملوث گروهه کي بي نقاب ڪري ڇڏيو۔ ڪارروائي دوران گروهه جي سرغنه عروج سميت پنج جوابدارن کي گرفتار ڪيو ويو اهي جڏهن ته هڪ عورت کي محفوظ تحويل ۾ ورتو ويو آهي۔ پوليس موجب گرفتار ٿيلن ۾ عروج، عبدالستار، عرفان، ڪنز ۽ مسڪان شامل آهن۔ان سلسلي ۾ معلوم ٿيو آهي ته گرفتار عروج گروهه جي اڳواڻ آهي، جيڪا مختلف علائقن مان غريب ۽ مجبور عورتن کي ڌوڪي ۽ لالچ ذريعي فحاشي لاءِ مجبور ڪندي هئي۔ جاچ مان معلوم ٿيو آهي ته هي گروهه عورتن کي مالي مدد ۽ روزگار جا واعدا ڪري پنهنجي جال ۾ ڦاسائيندو هو پوليس موجب اٺ سال اڳ نواب شاهه جي رهواسڻ هڪ ذهني طور ڪمزور عورت لاپتا ٿي هئي، جنهن کي هن ئي گروهه پنهنجي مذموم مقصدن لاءِ استعمال ڪيو۔ شاه لطيف پوليس ٽارگيٽڊ ڪارروائي دوران مذڪوره عورت کي بازياب ڪرائي محفوظ تحويل ۾ وٺي ورتو آهي۔پوليس جي ترجمان موجب گرفتار جوابدارن خلاف ضابطاڻي ڪارروائي شروع ڪئي وئي آهي، جڏهن⁠ته وڌيڪ جاچ جاري آهي۔