ملير ۾ پوليس ۽ ڏوھارين ۾ مبينا مقابلا، ٻه ڄڻا مارجي ويا، ٻه زخمي

ملير (رپورٽ: عبدالرشيد مورجھريو) ضلعي ملير ۾ پوليس ۽ ڏوھارين جي وچ ۾ ٻن ڌار ڌار مقابلن دوران ٻه ڏوهاري مارجي ويا جڏهن تہ ٻه زخمي ۽ سندن ٻيا ساٿي اونداهي جو فائدو وٺي فرار ٿي ويا۔ پوليس موجب ٻنهي هنڌن تان هٿيار، گوليون، روڪ رقم، زيور ۽ موبائل فونز هٿ ڪيا ويا آهن پوليس مطابق پهريون مقابلو ميمڻ ڳوٺ جي مصطفيٰ هائوسنگ سوسائٽي جي حدن ۾ ٿيو جتي اطلاع ملي هئي ته 5 کان 6 هٿياربند گهر اندر ڦرلٽ ڪرڻ بعد ڀڄي رهيا آهن۔ پوليس ٽيم موقعي تي پهتي ته ڏوهارين فائرنگ شروع ڪري ڏني جنهن تي پوليس پاران به جوابي فائرنگ ڪئي وئي فائرنگ جي نتيجي ۾ هڪ ڏوهاري مارجي ويو ۽ ٻيو زخمي ٿي پيو جڏهن تہ باقي ساٿي فرار ٿي ويا پوليس موجب مارجي ويل ڏوهاري جي سڃاڻپ عامر ۽ زخمي جي سڃاڻپ فياض جي نالي سان ٿي آهي۔ واقعي واري هنڌ تان پسٽل، گوليون، ڦريل موبائل فون، نقد رقم، سونا ۽ ڪپڙا هٿ ڪيا ويا۔ زخمي ڏوهاري کي علاج لاءِ اسپتال منتقل ڪيو ويو آهي، جڏهن⁠تہ ڀڄي ويل ڏوهارين جي ڳولا جاري آهي ٻيو مقابلو شاه لطيف ٽائون جام ڪنڊو مريم روڊ جي ڀرسان پيش آيو، جتي پوليس ۽ ڏوهارين ۾ فائرنگ دوران هڪ ڏوهاري مارجي ويو ۽ ٻيو زخمي ٿيو۔ پوليس موجب مارجي ويل ڏوهاري اڃا تائين نامعلوم آهي، جڏهن⁠تہ زخمي جي سڃاڻپ غلام رسول ولد محمد خان، عمر 40 سال طور ڪئي وئي آهي۔ ٻنهي کي جناح اسپتال منتقل ڪيو ويو آهي پوليس جو چوڻ آهي ته ٻنهي واقعن ۾ مارجي ويل ۽ زخمي ڏوهاري ممڪن طور ڪنهن منظم ڦرلٽ ڪندڙ ٽولي سان تعلق رکن ٿا۔ پوليس ڪيس داخل ڪري وڌيڪ جاچ شروع ڪري ڇڏي آهي۔