پوليو جي عالمي ڏينهن تي مڪلي ۾ آگاهي ريلي، عوام ۾ شعور اجاگر ڪرڻ تي زور

ايڊيشنل ڊپٽي ڪمشنر ون غلام دستگير شيخ جي اڳواڻي ۾ آگاهي ريلي ڪڍي وئي

ٺٽو( شفيق ڀٽي)پوليو جي عالمي ڏينهن جي موقعي تي ايڊيشنل ڊپٽي ڪمشنر ون غلام دستگير شيخ جي اڳواڻي ۾ سول اسپتال کان مين نيشنل هاءِ وي مڪلي تائين آگاهي ريلي ڪڍي وئي. ريلي جو مقصد پوليو جي خاتمي لاءِ عوام ۾ شعور پيدا ڪرڻ ۽ ويڪسينيشن جي اهميت کي اجاگر ڪرڻ هو. ريلي ۾ پروگرام مئنيجر مرف آدم ملڪ، ايڊيشنل سول سرجن ڊاڪٽر عنايت بلوچ، ايم ايس ساڪرو ڊاڪٽر ممتاز چوهاڻ، اين اسٽاپ آفيسر ڊاڪٽر راجيش ڪمار، ضلعي ڪوآرڊينيٽر اين آر ايس پي ڊاڪٽر آڪاش کان علاوه مختلف کاتن جي آفيسرن ۽ عملي، ڊاڪٽرن، پيرا ميڊيڪل اسٽاف، ليڊي هيلٿ ورڪرز ۽ ٻين شرڪت ڪئي. ان موقعي تي ايڊيشنل ڊپٽي ڪمشنر ون غلام دستگير شيخ ۽ ٻين چيو ته پوليو هڪ خطرناڪ بيماري آهي جيڪا ٻارن کي زندگي ڀر لاءِ معذور ڪري سگهي ٿي. هنن چيو ته عالمي پوليو ڏينهن اسان کي پنهنجي ايندڙ نسلن کي هن خطرناڪ بيماري کان هميشه لاءِ محفوظ رکڻ جي عزم جي تجديد جو پيغام ڏئي ٿو، تنهن ڪري والدين جو فرض آهي ته اهي پنهنجن پنجن سالن تائين عمر جي ٻارن کي پوليو جا ڦڙا ضرور پيارين. هنن چيو ته حڪومت ۽ صحت کاتو عوامي تعاون سان پوليو جي مڪمل خاتمي لاءِ پرعزم آهن. ريلي ۾ شرڪت ڪندڙن پنھنجي ھٿن ۾ بينر ۽ پلي ڪارڊ کنيا هئا جن تي پوليو خلاف نعرا لکيل هئا ۽ "پوليو کان پاڪ پاڪستان" جي عزم کي ورجايو ويو.