ایشیائی ترقیاتی بینک نے پنجاب میں زراعت، تعلیم اور صحت کے شعبوں کی بہتری کیلئے مجموعی طور پر 381 ملین ڈالر کے تین اہم ترقیاتی منصوبوں کی منظوری دے دی ہے۔
ایشیائی ترقیاتی بینک (ADB) کے جاری کردہ بیان میں کہا گیا ہے کہ پنجاب میں تعلیم، صحت اور زرعی ٹیکنالوجی میں سرمایہ کاری صوبے کی ترقی میں اہم کردار ادا کرے گی۔
زرعی شعبے کی بہتری کیلئے 120 ملین ڈالر کا قرض اور 4 ملین ڈالر کی گرانٹ منظور کی گئی ہے، جس کا مقصد ماحول دوست اور جدید زرعی مشینری کو فروغ دینا ہے۔
منصوبے سے 2 لاکھ 20 ہزار دیہی خاندانوں کو فائدہ پہنچے گا۔ اس کے تحت چھوٹے کاشتکاروں کو نئی مشینری فراہم کی جائے گی جبکہ 15 ہزار خواتین کی مہارتوں میں اضافہ بھی کیا جائے گا۔
پنجاب پاکستان کی غذائی پیداوار کا مرکزی صوبہ ہے، جو ملک کی 75٪ گندم، 69٪ چاول اور 91٪ مکئی پیدا کرتا ہے۔
اے ڈی بی نے پرانی زرعی مشینری کے استعمال سے ہونے والے نقصان اور فصل کی باقیات جلانے سے پیدا ہونے والی فضائی آلودگی کم کرنے کی ضرورت پر بھی زور دیا۔
تعلیم کے شعبے میں 107 ملین ڈالر کی منظوری دی گئی ہے، جس میں 100 ملین ڈالر قرض اور 7 ملین ڈالر گرانٹ شامل ہیں۔ اس رقم سے سیکنڈری سطح پر ایس ٹی سی ایم تعلیم کو جدید خطوط پر استوار کیا جائے گا۔
صحت کے شعبے کی بہتری کیلئے 150 ملین ڈالر کا قرض منظور کیا گیا ہے، جس کے ذریعے نرسنگ تعلیم کو اپ گریڈ کیا جائے گا، فیکلٹی کی تربیت کی جائے گی اور ڈیجیٹل HR نظام متعارف کرایا جائے گا، تاکہ صوبے میں اہل نرسوں کی تعداد بڑھائی جاسکے۔
منصوبے کے تحت لاہور، ملتان اور راولپنڈی میں جدید سینٹرز آف ایکسیلنس قائم کیے جائیں گے، جہاں تربیتی مراکز، سمیولیشن لیبز، ڈیجیٹل لرننگ کی سہولیات اور جینڈر فرینڈلی ماحول فراہم کیا جائے گا۔
0 تبصرے