ڏوڪري ۽ ڀرپاسي ۾ ثقافتي رنگ نروار، ڳوٺ ڳجهڙ ۾ مچ ڪچهري منعقد

سماجي اڳواڻ مور خان سمون طرفان منعقد مچ ڪچھري ۾ سياسي سماجي اڳواڻن ۽ صحافين جي شرڪت

ڏوڪري(اطهر ميمڻ) سنڌي ميڊيا جي 7 ڊسمبر تي اعلانيل ثقافتي سڏ جي مناسبت سان ڏوڪري ويجھو ڳوٺ ڳجھڙ ۾ سماجي اڳواڻ مور خان سمون طرفان مچ ڪچھري منعقد ڪئي وئي، جنھن ۾ ڏوڪري جي سياسي، سماجي اڳواڻن، صحافين زبير منگي، فدا حسين ابڙو، اطھر سنديلو، قاضي آفتاب احمد، سيد جمن شاھ، محمد علي بروھي، وڏيرو شمن جوڻيجو، سخي سرور جوڻيجو، حبيب الله کوکر، علي دوست کوکر، مظفر شاھاڻي، اعظم ڪانڌڙو، اصغر ميمڻ، قاضي فريد سميت ڳوٺاڻن وڏي انگ ۾ شرڪت ڪئي. مچ ڪچھري دوران سگھڙن ڏور بيتن، پروليون ۽ پھاڪا ٻڌايا جڏھن ته صوفي فقيرن راڳ ويراڳ جي محفل منعقد ڪندي ويٺلن تي وجد طاري ڪري ڇڏيو. ان موقعي تي مچ ڪچھري کي خطاب ڪندي مور خان سمون، زبير منگي، فدا حسين ابڙو، اطھر سنديلو، سخي سرور جوڻيجو چيو ته مچ ڪچهريون سنڌ جي قديم ثقافت جو حصو آھن، جتي علم، ادب ۽ شاعري ذريعي تصوف جي پرچار ٿئي ٿي. ھنن چيو ته سنڌي ميڊيا سنڌ جي ثقافت کي اجاگر ڪرڻ لاءِ ثقافتي ڏينھن ملھائڻ جو گڏيل اعلان ڪري سنڌو جي تھذيب کي سڄي دنيا ۾ متعارف ڪرايو آھي، جيڪو عمل سنڌ جي ثقافت جي تمام وڏي خدمت آھي. ان موقعي تي ارشاد سانگھرو، قاضي سھيل احمد، قاضي نياز حسين، اطھر ميمڻ، وحيد جوڻيجو ۽ ٻيا پڻ موجود ھئا.