آرٽس ڪائونسل ڪراچي ۾ ورلڊ ڪلچر فيسٽيول جي 24هين ڏينهن ميئر ڪراچي مرتضیٰ وهاب جو ٻارن سميت دورو

الله ڪراچي کي بري نظر ۽ حاسدن جي شر کان بچائي، ميئر ڪراچي

ڪراچي (اسٽاف رپورٽر)آرٽس ڪائونسل آف پاڪستان ڪراچي جي ميزباني ھيٺ 39 ڏينهن جاري ورلڊ ڪلچر فيسٽيول 2025 جي 24هين ڏينهن ميئر ڪراچي بيرسٽر مرتضیٰ وهاب پنهنجي ٻارن سميت آرٽس ڪائونسل ڪراچي جو دورو ڪيو. صدر آرٽس ڪائونسل محمد احمد شاهه ۽ فرانسيسي مصور شيفو مي به ساڻس گڏ هئا. ميئر ڪراچي اسنارڪل جي ذريعي آرٽس ڪائونسل جي عمارت تي فرانسيسي فنڪار شيفو مي پاران ٺهيل ميورل آرٽ جو جائزو ورتو، جنهن جو نالو “ڪراچي بلومز” رکيو ويو آهي ان موقعي تي ميئر ڪراچي مرتضیٰ وهاب چيو ته ڪراچي ۾ بوم بوم گهڻو ٿيو آهي، پر هاڻي اسان ڪراچي کي بلومز ڪري رهيا آهيون. هن چيو ته فرانسيسي فنڪار وڏي محنت سان هي ميورل تيار ڪيو آهي. اسان تصور به نه ڪيو هو ته اهڙو شاندار فيسٽيول ٿيندو. هڪ سؤ ٻاهتر ملڪن جا فنڪار هتي شرڪت ڪري رهيا آهن ۽ شهر واسطن جي محبتون کڻي واپس پيا وڃن. هن وڌيڪ چيو ته ڪراچي جي ديوارن تي بيهوده ۽ غيراخلاقي اشتهار ڏسي سخت ڪراهت محسوس ٿيندي آهي، جيڪي ماڻهو اهڙا اشتهار لڳائين ٿا، اهي پنهنجن گهرن تي لڳائن، بغير اجازت اهڙا اشتهار لڳائڻ مڪمل طور غيرقانوني عمل آهي. ميئر وڌيڪ چيو ته اسان ڪراچي کي تبديل ٿيندو ڏسي رهيا آهيون، فن ۽ ثقافت هن شهر جي اصل سڃاڻپ هئي، جيڪا وقت سان گڏ لڪل وئي هئي، پر هاڻي ٻيهر واپس اچي رهي آهي. جيڪڏهن اسان چاهيون ته ڪراچي کي وڌيڪ خوبصورت بڻائي سگهون ٿا. مرتضیٰ وهاب دعا ڪئي ته الله ڪراچي کي بري نظر ۽ حاسدن جي شر کان بچائي. هن چيو ته سٺيون ۽ خراب ٻئي شيون هونديون آهن، پر اسان پنهنجي سٺايين سان برائين جو خاتمو ڪري سگهون ٿا. جڏهن هي شهر هلندو آهي ته سڄو ملڪ هلي ٿو. اردو زبان تمام سهڻي آهي، ۽ اسان فن ۽ ثقافت جي واڌاري لاءِ پنهنجا قدم جاري رکنداسين.