مقابلے سے واک آؤٹ کرنے والی میکسیکن حسینہ ہی مس یونیورس بن گئی

تھائی لینڈ میں ہونے والے مس یونیورس 2025 کے فائنل میں میکسیکو کی 25 سالہ فاطمہ بوش نے تنازعات اور دباؤ کے باوجود شاندار پرفارمنس کے ذریعے مس یونیورس کا تاج اپنے سر پر سجا لیا۔ مقابلے میں 120 ممالک کی حسیناؤں نے حصہ لیا، جن میں تھائی لینڈ کی امیدوار رنر اپ رہی، جبکہ وینزویلا اور فلپائن کی حسینائیں بھی ٹاپ فائیو میں شامل رہیں۔ پاکستان کی نمائندگی 25 سالہ روما ریاض نے کی، جبکہ فلسطین کی پہلی حسینہ نادین ایوب نے بھی جلوے دکھائے۔ فائنل سے قبل ڈرامائی صورتحال اس وقت پیدا ہوئی جب تھائی ایونٹ ڈائریکٹر نے فاطمہ بوش کو سرعام ڈانٹتے ہوئے "بیوقوف" کہا، جس پر فاطمہ نے واک آؤٹ کیا اور دیگر امیدواروں نے بھی اس سے یکجہتی کا اظہار کیا۔ بعد ازاں ایونٹ آرگنائزر نے فاطمہ سے معافی مانگ لی۔ فاطمہ بوش نے فیشن ڈیزائن کی تعلیم حاصل کی ہے اور وہ سماجی مسائل کو اجاگر کرنے کے لیے سرگرم رہتی ہیں۔ انہوں نے ستمبر 2025 میں مس میکسیکو کا ٹائٹل اپنے نام کیا تھا۔