عوامي پريس ڪلب ٺٽو جي جنرل باڊي جو صدر بلاول سمون جي صدارت ۾ اجلاس, مختلف پروگرام ڪرائڻ بابت غور ويچار

پريس ڪلب جي بهتري ۽ ميمبرن جي تربيت لاءِ پروگرامز منعقد ڪرڻ جو فيصلو

ٺٽو ( محمد شفيق ڀٽي)عوامي پريس ڪلب ٺٽو جي جنرل باڊيءَ جو اجلاس صدر بلاول سمون جي صدارت هيٺ منعقد ٿيو، جنهن ۾ ميمبرن وڏي انگ ۾ شرڪت ڪئي۔ اجلاس ۾ پريس ڪلب جي بهتري ۽ ميمبرن جي صحافتي تربيت جي حوالي سان مختلف تربيتي پروگرامن جي انعقاد جو فيصلو ڪيو ويو۔صدر بلاول سمون پنهنجي خطاب ۾ چيو ته ضلعو ٺٽو پنهنجي سياسي، سماجي ۽ جاگرافيائي بيھڪ جي لحاظ کان سنڌ جو هڪ منفرد ضلعو آهي، جيڪو جبلن، ميداني علائقن، دريائي پٽي ۽ ڊگهي سامونڊي ڪناري تي مشتمل آهي۔ هن چيو ته اهڙي قدرتي وسيلن سان مالا مال ضلعي ۾ روزگار ۽ بنيادي سهولتن جي کوٽ نه هجڻ گهرجي۔هن جو چوڻ هو ته صحافين جي ذميواري آهي ته هو عوام جا حقيقي مسئلا اجاگر ڪن ۽ مظلومن جو آواز بڻجي سندن ڏک درد کي اقتداري ايوانن تائين پهچائين۔ بلاول سمون وڌيڪ چيو ته صحافت کي ذاتي مفاد بدران عوامي خدمت جي جذبي سان سرانجام ڏيڻ گهرجي۔اجلاس کي جنرل سيڪريٽري محمد عمر سرائي، نائب صدر عبيدالله جماري، منظور پالاري، اي بي شورو، مجاهد واريو ۽ ٻين ميمبرن پڻ خطاب ڪيو۔ مقررن ضلع ۾ وڌندڙ "آئس" نشي جي رجحان تي گھري تشويش جو اظهار ڪيو ۽ مطالبو ڪيو ته ان تي مڪمل پابندي لڳائي وڃي۔ انهن ايس ايس پي ٺٽو ۽ چونڊيل نمائندن کي اپيل ڪئي ته نوجوان نسل کي تباهي کان بچائڻ لاءِ فوري قدم کنيا وڃن۔اجلاس ۾ نوجوانن تي زور ڀريو ويو ته هو سوشل ميڊيا جو مثبت انداز ۾ استعمال ڪندي پنهنجن حقن لاءِ آواز اٿارين ۽ صحافتي ادارن ۾ شامل ٿي پنهنجو ڪردار ادا ڪن۔ صدر يقين ڏياريو ته عوامي پريس ڪلب ٺٽو نوجوانن جي هر ممڪن رهنمائي ڪندو۔ان کان علاوه، اجلاس ۾ اهو فيصلو ڪيو ويو ته ضلعي اندر ڪم ڪندڙ مختلف اين جي اوز جي ڪارڪردگي جو جائزو ورتو ويندو ۽ انهن جي جاري منصوبن جو تفصيل عوام تائين پهچايو ويندو۔ اجلاس ۾ اهو پڻ طئي ڪيو ويو ته ڊي سي ٺٽو جي هدايتن مطابق مقامي نوجوانن جي روزگار جي تناسب جو پڻ مشاهدو ڪيو ويندو۔اجلاس ۾ محمد شفيق ڀٽي عبدالرشيد سولنگي، مختيار جان چانڊيو، عاشق علي سولنگي، فقار علي جوکيو، زاھد امير جوکيو، علي حيدر سومرو، عدنان سمون، خالد ڪيهر، فاروق شيخ، بلاول ٻاٻڙو، ارشاد جوکيو، ڪامريڊ زاھد ۽ ٻين ميمبرن شرڪت ڪئي۔