ٺٽو پوليس پاران هڪ ڦورو کي زخمي حالت ۾ گرفتار ڪرڻ جي دعويٰ

ٺٽو (ڊ ر)ٺٽي ضلعي جي حدن ۾ پوليس ۽ جوابدارن وچ ۾ فائرنگ جو مقابلو ٿيو، جنهن دوران پوليس هڪ جوابدار کي زخمي حالت ۾ گرفتار ڪري ورتو. پوليس موجب گرفتار ٿيل جوابدار ماضي ۾ رهزني ۽ موٽر سائيڪل ڦرون جي ڪيترين ئي وارداتن ۾ ملوث رهيو آهي. مليل ڄاڻ موجب مقابلو ٿاڻو ٺٽو جي حدن اندر 22 آر ڊي ڀريو شيدي موري وٽ ٿيو، جتي پوليس جي فائرنگ ۾ هڪ جوابدار زخمي ٿي پيو. زخمي حالت ۾ گرفتار ٿيل جوابدار جي سڃاڻپ محمد پريل ولد محمد جاويد ابڙو طور ٿي، جيڪو اصل لاڙڪاڻو ۽ هن وقت شاهه لطيف ڪالوني مڪلي ۾ رهائش پذير آهي. ابتدائي جاچ مطابق محمد پريل ٺٽو، مڪلي، گهارو ۽ ڌاٻيجي سميت مختلف علائقن ۾ ڌاڙن ۽ موٽر سائيڪل ڦرون جهڙين ڪيترين ئي وارداتن ۾ شامل رهيو آهي. پوليس مقابلي واري هنڌ تان جوابدار وٽان هڪ ريوالور پڻ هٿ ڪيو ويو، جنهن کي مبينا طور تي ڏوهاري وارداتن ۾ استعمال ڪيو ويندو هو. پوليس جو چوڻ آهي ته گرفتار زخمي جوابدار جو مڪمل ڪرمنل رڪارڊ جانچيو پيو وڃي، جڏهن ته سندس ٻه ساٿي غمشاد ولد پٺاڻ پنھور ۽ شڪور ولد موريو خاصخيلي مقابلي دوران فرار ٿي ويا آھن. فرار ٿيل جوابدارن جي گرفتاري لاءِ پڻ ڇاپا جاري آهن. جڏھن ته بزخمي حالت ۾ گرفتار جوابدار کي علاج لاءِ اسپتال منتقل ڪيو ويو آهي.