ٺٽي ۾ وٽرنري ڊاڪٽرن ۽ ملازمن پاران مطالبن جي مڃتا لاءِ احتجاجي ريلي ڪڍي وئي

گذريل رات گهوڙاٻاري جي وٽرنري ڪئمپ تان واپسي تي ٻن وٽرنري ڊاڪٽرن کان ڦرلٽ ڪئي وئي: مظاهرين

ٺٽو(ڊر) چوپائي مال جو علاج ڪندڙ وٽرنري ڊاڪٽر ۽ لائيو اسٽاڪ کاتي جا ملازم کانئن ٿيندڙ مسلسل ڦُر جي وارداتن خلاف سراپا احتجاج بڻجي ويا، مڪلي تي وٽنري کاتي جي ڊپٽي ڊائريڪٽر ٺٽو جي آفيس کان مڪلي تائين ھڪ احتجاجي ريلي ڪڍي مظاهرو ڪري ڊاڪٽرن سميت عملي کي تحفظ ڏيارڻ جو مطالبو ڪيو ويو، گذريل رات گهوڙاٻاري جي وٽرنري ڪئمپ تان واپس موٽندي پيرپٺو ويجهو هٿياربندن هٿان يرغمال بڻائي ٻن وٽرنري ڊاڪٽرن ڊاڪٽر نيل ڪنت ۽ ڊاڪٽر شعيب لُنڍ کان موٽر سائيڪل موبائيل فون ۽ روڪ رقم ڦر ڪرڻ واري واقعي خلاف مخدوم وٽرنري ايسوسئيشن ٺٽو ۽ پيراويٽ ٺٽو جي سڏ تي گڏيل طور تي ڊاڪٽرن ۽ ملازمن پاران ھڪ احتجاجي ريلي مڪلي ڪڍي مظاهرو ڪري سخت نعريبازي ڪندي وٽرنري ڊاڪٽرن ۽ پيراويٽ عملي جي اڳواڻن ڊاڪٽر منظور گرماڻي، غلام مهدي ويسر، ڊاڪٽر غلام مصطفي پليجو، ڊاڪٽر سُمير سهتو، اياز علي سومرو، اعجاز عباسي، لطيف گوپانگ ۽ ٻين چيو ته وٽرنري ڊاڪٽرن ۽ عملي کان ڦر جي هيء ٽئين واردات آھي، ان کان اڳ ٻن ڌار ڌار وارداتن ۾ سندن عملي کان ڦر جون وارداتون ڪيون ويون آھن، پر پوليس ڪابه ڪارروائي ناهي ڪئي، هنن چيو ته گهوڙاٻاري بند تي قائم وٽرنري کاتي جي فلڊ رليف ڪئمپ مان چوپائي مال جو علاج ڪري واپس ٿيندڙ سندن ٻن ڊاڪٽرن ڊاڪٽر نيل ڪنت ۽ ڊاڪٽر شعيب لُنڍ کان هٿياربندن هٿيارن جي زور تي کانئن سندن موٽر سائيڪل، روڪ رقم ۽ موبائيل فون ڦر ڪري فرار ٿي ويا، پر پوليس اڃا تائين ڪوبه ٻوٽو نه ٻاريو آھي. هنن چيو ته سندن ڊاڪٽر ۽ عملو رات ڏينهن ٻوڏ توڙي برسات جي ايمرجنسي ۾ فيلڊ ۾ مختلف رليف ڪئمپن تي ڊيوٽي ڏيندڙ آھي، هنن واقعن کانپوء اسان عدم تحفظ جو شڪار ٿي ويا آھيون، ھنن گھر ڪئي تہ فوري طور تي اعلي اختياريون نوٽيس وٺي ڦر ٿيل سامان واپس ڪرائي وٽرنري عملي کي تحفظ مھيا ڪري انھن کي رسڪ الائونس جاري ڪيو وڃي. ٻئي صورت ۾ احتجاج جو دائرو سڄي سنڌ تائين وڌايو ويندو