جنگشاھي جي 133 ورھيه پراڻي پرائمري اسڪول جي عمارت زبون حالي جو شڪار

عمارت کي فوري طور خالي ڪرايو وڃي ۽ تعليمي سرگرمين کي ڪنھن محفوظ ۽ مناسب ھنڌ منتقل ڪيو وڃي: اسسٽنٽ انجنيئر ورڪس

ٺٽو(ڊ ر)ضلعي ٺٽي جي ڪوھستاني شھر جنگشاھي ۾ واقع تاريخي گورنمينٽ بوائز پرائمري اسڪول جيڪو سن 1892ع ۾ قائم ڪيو ويو ھو جيڪو سخت زبون حالي جو شڪار ٿي چڪو آھي. 133 ورھين پراڻي ھن تعليمي اداري جي عمارت عدم مرمت ۽ لاپرواھي سبب شاگردن ۽ استادن جي لاءِ حياتيءَ جو خطرو بڻجي وئي آھي ۽ ڪنھن وڏي حادثي جو خدشو پيدا ٿي ويو آھي. مقامي سياسي ۽ سماجي اڳواڻن، والدين ۽ رھواسين ڳڻتي جو اظھار ڪندي چيو آھي تہ اسڪول جي ڇتين ۽ ڀتين جا چاپڙ ۽ ملبو ڪرڻ روز جو معمول بڻجي ويو آھي جنهن سبب معصوم شاگرد خوف ۽ ھراس ۾ مبتلا ٿي پڙھڻ تي مجبور آھن ۽ تعليمي عمل سخت متاثر ٿي رھيو آھي. ھنن واضح ڪيو تہ جيڪڏھن بروقت مرمت ۽ بحالي جو ڪم نہ ڪيو ويو تہ ڪنھن وڏي حادثي جو خطرو موجود آھي جيڪو قيمتي جاني نقصان جو سبب بڻجي سگھي ٿو. علائقي واسين ۽ والدين وزير اعليٰ سنڌ سيد مراد علي شاھ، صوبائي وزير تعليم سيد سردار شاھ، تعليم کاتي جي اعليٰ اختيارين ۽ ضلعي ٺٽي جي چونڊيل نمائندن کان مطالبو ڪندي چيو آهي تہ فوري نوٽيس ورتو وڃي ڇاڪاڻ تہ اسڪول جي عمارت جي فوري مرمت ۽ بحالي کانسواءِ ٻارن کي محفوظ ۽ صحتمند تعليمي ماحول فراهم ڪرڻ ممڪن ناھي. ٻئي طرف اسسٽنٽ انجنيئر ايجوڪيشن ورڪس سب ڊويزن ٺٽو اسڪول جو تفصيلي جائزو وٺي پنھنجي رپورٽ اعليٰ اختيارين کي موڪلي ڇڏي آھي. رپورٽ ۾ انڪشاف ڪيو ويو آھي تہ جي بي پي ايس جنگشاھي جا بلاڪ “اي” ۽ بلاڪ “بي” سخت زبون حال ۽ خطري واري حالت ۾ آھن. اسسٽنٽ انجنيئر پنھنجي رپورٽ ۾ ھيڊ ماسٽر کي ھدايت ڪئي آھي تہ عمارت کي فوري طور خالي ڪرايو وڃي ۽ تعليمي سرگرمين کي ڪنھن محفوظ ۽ مناسب ھنڌ منتقل ڪيو وڃي تہ جيئن شاگردن ۽ استادن کي ڪنھن جاني نقصان کان بچائي سگھجي. ان کان علاوه اسسٽنٽ انجنيئر ايگزيڪيوٽو انجنيئر ايجوڪيشن ورڪس ڊويزن ٺٽو ۽ تعلقه ايجوڪيشن آفيسر پرائمري ضلعو ٺٽو کي پن ھنگامي قدمن لاءِ مطلع ڪري ڇڏيو آھي تہ جيئن مرمت ۽ بحالي جو عمل جلدي ممڪن بڻائي شاگردن کي محفوظ تعليمي ماحول مهيا ڪري سگھجي.