ملير ۾ به تيز برسات سبب نديون ۽ نالا اوور فلو، هڪ ڄڻو ندي ۾ ٻڏي فوت

اطلاع تي ڊپٽي ميئر ڪراچي سلمان مراد ۽ ڊپٽي ڪمشنر ملير سليم الله اوڍو ملير ندي تي پهچي ويا

ملير (رپورٽ: عبدالرشيد مورجھريو) لاڳيتي ۽ تيز برساتن سبب ملير سميت شهر ڀرسان وهندڙ نديون ۽ نالا اوور فلو ٿي ويا آهن، جنهن ڪري ڪيترن ئي علائقن ۾ پاڻي جي وهڪري سان جاني ۽ مالي نقصان ٿيو آهي. برساتي پاڻي جي گهڻي مقدار سبب لنڪ روڊ به بند ڪيو ويو آهي، جڏهن ته ڪيترن ئي ڳوٺن جا هڪٻئي سان رابطا منقطع ٿي ويا آهن.قائدآباد ڀرسان يار محمد ڳوٺ وٽ ندي ۾ ٻه شهري ڪري پيا، جن مان هڪ کي ريسڪيو ٽيمون بروقت ڪڍڻ ۾ ڪامياب ٿي ويون، جڏهن⁠تہ ٻيو شهري درياهه ۾ ٻڏي ويو. اطلاع ملڻ تي ڊپٽي ميئر ڪراچي سلمان مراد ۽ ڊپٽي ڪمشنر ملير سليم الله اوڍو حادثي واري هنڌ پهچي ڳولا جي نگراني ڪئي. ڊپٽي ڪمشنر موجب هڪ جو لاش هٿ اچي ويو آهي، جڏهن⁠تہ ٻئي لاءِ ڳولا جو عمل جاري آهي.ڳوٺاڻن ۽ مقامي رهواسين جو چوڻ آهي ته برساتي نالن ۽ ندين ۾ پاڻي ڀرجي وڃڻ ڪري ڪيترن ئي ڳوٺن جو هڪٻئي سان رابطو ختم ٿي ويو آهي، جنهن سبب علائقي ۾ سخت پريشاني ۽ ڏکيايون وڌي ويون آهن. انهن انتظاميا تي تنقيد ڪندي چيو آهي ته ملير جي ٽنهي ٽائونن جي مقامي انتظاميا مڪمل طور غائب آهي، جڏهن⁠تہ صورتحال هنگامي نوعيت اختيار ڪري چڪي آهي.رهواسين وڏي وزير سيد مراد علي شاهه ۽ صوبائي انتظاميا کي اپيل ڪئي آهي ته هو هنگامي بنيادن تي ڳوٺاڻن جي مدد لاءِ قدم کڻن ۽ ريسڪيو آپريشن ۾ وڌيڪ ٽيمون مقرر ڪن، ته جيئن وڌيڪ جاني نقصان کان بچي سگهجي.