عمرڪوٽ ۾ صحت کاتي جي ملازمن جو برطرفين خلاف احتجاجي مظاهرو

ڪورونا وبا دوران مشڪل وقت ۾ پنهنجون خدمتون سرانجام ڏنيون، پر مستقل ڪرڻ بدران برطرف ڪيو پيو وڃي: ملازم

عمرڪوٽ (ڊ ر) عمرڪوٽ ۾ صحت کاتي جي ملازمن برطرفين خلاف ڊپٽي ڪمشنر آفيس ۽ پريس ڪلب عمرڪوٽ آڏو احتجاجي مظاهرو ڪيو، مظاهري ۾ وڏي انگ ۾ ملازم شامل ٿيا، جن پنهنجن مطالبن جي حق ۾ نعريبازي ڪئي، ملازمن جو چوڻ هو ته ڪورونا وبا دوران صحت کاتي ۾ اسان کي عارضي بنيادن تي ڀرتي ڪيو ويو، اسان مشڪل وقت ۾ پنهنجون خدمتون سرانجام ڏنيون، پر هاڻي مستقل ڪرڻ بدران اسان کي زوري طور برطرف ڪيو پيو وڃي جيڪو سراسر ناانصافي آهي، ملازمن مطالبو ڪيو ته برطرفي بدران کين مستقل ڪيو وڃي ته جيئن کاتي ۾ پکڙيل بيچيني ختم ٿئي، احتجاج ۾ گل بهار رند، صحبت سومرو، دليپ ڪمار مهاراج، نثار سميجو، رامچند راءِ ۽ ٻين ملازمن شرڪت ڪئي، جن حڪومت کان فوري طور برطرفي جا حڪم واپس وٺڻ ۽ کين مستقل ڪرڻ جو مطالبو ڪيو.