پٿورو ويجهو سعيدڪي شاخ مان عورت جو ڪپڙن کان آجو، ڄنگهه ۽ ٻانهه ڪٽيل لاش هٿ

لاش جي سڃاڻپ جيئان زال کيمچند ڀاٽ طور سڃاڻپ، عورت کي بيدردي سان قتل ڪيو ويو آهي: وارث

عمرڪوٽ (رپورٽ:ڪانجي مل رکيسر) ضلعي عمرڪوٽ جي تعلقه پٿورو جي شادي پلي ٿاڻي جي حد اندر سعيدڪي شاخ مان هڪ عورت جو مسخ ٿيل لاش هٿ آيو، پوليس موجب لاش ڪيترن ئي ڪلاڪن تائين پاڻي ۾ لڙهندو رهيو، اطلاع ملڻ تي اي ايس آءِ محمد علي نھڙي ٽيم سان گڏ واقعي واري هنڌ پھتو ۽ ليڊيز پوليس جي مدد سان لاش کي ٻاهر ڪڍي سول اسپتال پٿورو منتقل ڪيو ويو، پوليس جو چوڻ آهي ته لاش ڪپڙن کان آجي حالت ۾ هو، عورت جا هٿ پير ڪٽيل هئا ۽ چهري تي تشدد جا صاف نشان موجود هئا، دهشتناڪ صورتحال سبب علائقي ۾ سخت خوف ۽ هراس پکڙجي ويو، سوشل ميڊيا تي خبر وائرل ٿيڻ بعد وارث فوتيءَ جو ڀاءُ ۽ پٽ، اسپتال پهتا، هنن لاش جي سڃاڻپ شريمتي جيئان زال کيمچند ڀاٽ، رهواسي ڪاٺڙي اسٽاپ، تعلقه سنڌڙي طور ڪئي، مرحومه بيوه هئي پوليس ضروري قانوني ڪاروائيءَ مڪمل ڪرڻ بعد لاش وارثن حوالي ڪري ڇڏيو، ابتدائي جاچ ۾ شڪ ظاهر ڪيو پيو وڃي ته لاش پاڻي جي وهڪرن سان گڏ سنڌڙي جي ڀرسان کان هيٺ لڙهي آيو، پوليس عملدارن جو چوڻ آهي ته حتمي صورتحال پوسٽ مارٽم ۽ فرانزڪ رپورٽ اچڻ بعد ئي سامهون ايندي.