ملير: هاشم خاصخيلي ڳوٺ جي ڊسپينسري دوائن کان محروم، غريب مريض پريشان

ملير (رپورٽ: عبدالرشيد مورجھريو) هاشم خاصخيلي ڳوٺ جي سرڪاري ڊسپينسري ڊگهي عرصي کان دوائن ۽ ضروري ميڊيسن جي فراهمي کان محروم آهي، جنهن سبب علائقي جا رهواسي سخت مشڪلاتن کي منهن ڏئي رهيا آهن۔علائقي جي سماجي اڳواڻ يونس اے ڪي صحافين کي ٻڌايو ته ڊسپينسري ۾ نه دوائون موجود آهن ۽ نه ئي انجڪشن، جنهن ڪري غريب ۽ نادار مريضن کي پرائيويٽ ميڊيڪل اسٽورن تان مهانگيون دوائون خريد ڪرڻيون پيون ڊاڪٽر ۽ ڊسپينسر الزام لڳايو ته ڪيترائي ڀيرا لکيت ۾ درخواستون ڏيڻ ۽ مطالبا ڪرڻ باوجود گڊاپ ٽائون چيئرمين ڊسپينسري کي ميڊيسن مهيا نٿو ڪري۔ هنن جو چوڻ هو ته بغير علاج جي غريب، مزدور پيشه، يتيم ۽ نادار مريض سخت پريشانيءَ ۾ آهن ۽ مختلف موذي بيمارين ۾ مبتلا ٿي رهيا آهن علائقي واسين وڌيڪ چيو ته سيوريج جون لائينون بند ٿيڻ ۽ ڳوٺ ۾ گندگي ۽ تعفن سبب وبائي بيماريون پکڙجي رهيون آهن، پر ڊسپينسري ۾ نه دوائون آهن ۽ نه ئي انجڪشن، جنهن ڪري صورتحال وڌيڪ سنگين ٿي وئي آهي عوام وزيراعظم، وزيراعليٰ سنڌ، وزير صحت، سيڪريٽري صحت، ڪميشنر ڪراچي، ڊي سي ۽ ڊي ايڇ او ملير سميت لاڳاپيل اختيارين کان مطالبو ڪيو آهي ته هاشم خاصخيلي ڳوٺ جي ڊسپينسري کي فوري طور تي دوائون فراهم ڪيون وڃن ۽ غفلت جا ذميوار اختيارين خلاف قانوني ڪارروائي ڪئي وڃي۔