هر هڪ حڪومت جي اولين ترجيح اها هوندي آهي ته سڀ کان اڳ ۾ عوام کي امن مهيا ڪري ۽ هونئن به بنيادي حقن ۾ اها ڳالهه شامل آهي ته شهرين کي امن سلامتي ڪهڙي طرح امن ڏياري ملڪي ترقي ۾ بهتر خدمت سرانجام ڏني وڃي پر بدقسمتي سان سنڌ جي ڪجهه علائقن ڪشمور، ڪنڌڪوٽ، گهوٽڪي، اٻاوڙو ، جيڪب آباد ۽ ان جي ڀرسان وارن علائقن ۾ مسلسل نو گو ايريا وارو ماحول پيدا ڪيو ويو آهي ۽ هاڻي به انهن علائقن ۾ رات جو سفر ڪرڻ رسڪ کان خالي ناهي پر هن وقت شڪر الحمدلله وري به ڪجهه انهن علائقن جي امن ڀري صورتحال آهي. تازو جيڪا ڪجهه مهينن کان لاڙڪاڻو شهر جي اندر بدامني جي باهه پوري لاڙڪاڻو شهر جي شهرين لاءِ عذاب ۽ اذيت جو سبب بڻيل آهي اها هي ڳالهه ته هر روز هڪ ٻه وارداتون موٽر سائيڪل ڦر ڪرڻ ۽ موٽر سائيڪل نه ڏيڻ تي مزاحمت تي ڦورو غنڊا چور رهزن قاتل موٽر سائيڪل جي مالڪن کي گولين جو کاڄ بڻائي فرار ٿي وڃڻ ڪنهن ڳجهارت جيان ڳالھ سامهون اچي رهي آهي، ڇا ڦورو چور هڪ ئي وقت ڪيتريون وارداتون ڪندا رهن ٿا پر گرفتار نٿا ٿين ۽ روز ڪڏهن پراڻي بس اسٽينڊ جي رهائشي نوجوان 18 سالا احمد علي ڀٽي کي لاڙڪاڻي شهر جي وچ ۾ ذوالفقار باغ وٽ موٽر سائيڪل ڦري مزاحمت تي قتل ڪيو ويو ۽ انهي ڏينهن ئي قمبر ۾ نوجوان ساگر چانڊيو جو قتل ٿئي ٿو جڏهن ته ٻئي ڏينهن تي وري لاڙڪاڻو شهر لڳ باقراڻي ۾ پيء پٽ نوجوان فاروق احمد سهڙو ۽ پيرسن پيء عبدالقادر سهڙو کي موٽر سائيڪل ڦر دوران مزاحمت تي هٿياربندن جي هٿان ٻه قتل ٿين ٿا، اهڙي طرح هڪ هفتي اندر ڏهه کن نوجوان موٽر سائيڪل سوار بي گناهه ماڻهن کان مزاحمت تي هٿياربند ڦورو موٽر سائيڪلون ڦر ڪري ماڻهو انساني جانيون ختم ڪري ويا آهن، لاڙڪاڻي ۾ بدامني جي باهه تيز تر ٿي وئي آهي ، شهري غير محفوظ بڻجي ويا، روز روز موٽر سائيڪل ڦرون ، نوجوانن کي موبائل ڦر دوران قتل ڪرڻ ڄڻ معمول بڻجي ويو آهي، لاڙڪاڻي ضلعي جي باقراڻي ٿاڻي جي حـد ۾ ايئرپورٽ روڊ تي شھيد بينظير يونيورسٽي ڪئمپس لڳ مريض کڻي ايندڙ ڳوٺاڻن کان موٽر سائيڪل ڦـر دؤران ڦورن ھٿان عبدالقادر سھڙو ۽ سندس نوجوان پٽ مختيار سھڙو بيدرديء سان قتل ٿي ويا، پ پ پ جو چيئرمين بلاول ڀٽو زرداري,ميڊم فريال ٽالپر ۽ وزير اعلي مراد علي شاھ ۽ لاڙڪاڻي صدر آصف زرداريء جو پڻ لاڙڪاڻو جي آمد وقت روز روز ڦرون لوٽمار جا واقعا ٿين لڳا آهن، لاڙڪاڻي ۾ بدامنيء جو راڪاس ڇانيل آهي، لاڙڪاڻو شهر ۾ بدمعاشن، رھزنن ۽ ڏوھارين جي آماجگاھ تيز سان وڌڻ لڳي آهي، لاڙڪاڻو شهر شھرين لاء مقتل گاھ بڻجي ويو آهي، ھڪ ھفتي اندر ڳڙھي خدابخش ڀٽو سميت ضلعي لاڙڪاڻي اندر مختلف ٿاڻن جي حدن ۾ الڳ الڳ وارداتن ۾ ڦـر دؤران ڦورن ھٿان مارجي ويل بيگناھ شھرين جو انگ اڌ درجن تي پھچي ويو، سڄي ضلعي جي نفريء سميت سندن جي اردليء ۾ مصروف بي يارومددگار شھري سرعام ڏوھارين ھٿان لٽجڻ, ڦرجڻ ۽ مارجـڻ لڳا. شهرين مطالبو ڪيو ته خدارا لاڙڪاڻو شهر کي امن قائم ڪرڻ لاءِ خصوصي قدم کنيا وڃن. حڪمران جماعت جي نمائندن اڳيان نوجوان جي دانهن. لاشن تي بيٺل خوشامدي خلق نوجوان جو ساٿ ڏيڻ بدران کيس خاموش ڪرائڻ م مصروف رهيا آهن ۽ لاڙڪاڻو شهر جي گهر گهر ڄڻ ته تڏو وڇايل آهي. جمعي جي ڏينهن اکيون تڏهن ڀرجي آيون جڏهن نوجوان احمد علي ڀٽي جي ٽيجهي دوران پراڻي بس اسٽاپ وٽ تڏو وڇايل هيو ۽ ڳڀرو نوجوان علي احمد ڀٽي جي والد سان تعزيت ٿي رهي هئي ته انهيءَ جي ڇا ته ڏک غم افسردگي ۾ حالت زار هئي، حڪمران، وڏيرا ڀوتار، انتظاميا ڪجهه الله جي بي آواز لٺ کان ڊڄو ۽ امن قائم ڪرايو وڃي، لاڙڪاڻي شهر مٿان عذاب نازل ٿيل آهي، ڀوتارن جي بنگلن جو خير هجي باقي عام ماڻهون مري يا جيئي حڪومت کي ڪهڙي پرواهه.خوشامدي چمچا چون ٿا امن لڳو پيو آهي،
لاڙڪاڻي شهر ۾ هفتي اندر ٻيو دل ڏاريندڙ واقعو.ڦورن چائنا جي پراڻي موٽر سائيڪل خاطر پي پٽ ماري ڇڏيا پر ڏاج ۾ مليل ايس ايس پي بدلي ٽرانسفر نه ٿيندو. لاڙڪاڻو پوليس مقتولن بجاءِ ڦورن جي پاسي بيٺل ته نه آهي، ڦر دوران مزاحمت تي قتل ٿي ويل پيءُ پٽ جي قتل ۾ ملوث جوابدارن جو سھولت ڪار پوليس اھلڪار وٽان موبائل فون رڪوري هڪ وڏو سوال آهي. هاڻي ته اها ڳالهه بدقسمتي سان بيٺي آهي ته (هجئي ناڻو ته ڇڏ لاڙڪاڻو), ڇاڪاڻ ته لاڙڪاڻو واسي مڪمل طور تي غير محفوظ بڻايا ويا آهن ۽ لاڙڪاڻو شهر جيڪو هڪ باشعور عوام جو شهر آهي انهي کي ڏوهارين لاءِ جنت بڻايو ويو آهي. اسان جي تجويز آهي ته حڪومت اهو اعلان ڪري ڇڏي ته جيڪو به ڦورو ،ڌاڙيل، دهشتگرد، غنڊو عوام جي جان مال تي حملو ڪندو ۽ بي گناهه ماڻهن جي قتل ۾ ملوث رهيو انهي لاء اسلامي قانون مطابق ۽ سعودي حڪومت جيان عبرت ناڪ انجام ڪيو ويندو. ڪجهه اهڙا حقيقي اصلي دهشتگرد ڦورو پڪڙيا جيڪي ماڻهن کان موٽر سائيڪلون به ڦر ڪن ٿا ۽ مزاحمت تي بي گناهه ماڻهو ماريا وڃن ٿا انهن قاتلن ڦورن کي سرعام ماري ٻيو نه ڊي آء جي پوليس ۽ ايس ايس پي چوڪ وٽ انهن قاتلن جا لاش ٽنگيا وڃن جيئن سعودي حڪومت رهزنن قاتلن زانين ،رشوت خورن ،چورن جو انجام عبرتناڪ ڏيڻ لاءِ امن قائم ڪرائيندي رهي آهي. سماج معاشري ۾ عوام کي سڀ کان پهرين امن، امن ۽ امن گهرجي، ضروري ناهي ته انتظاميا رڳو پنهنجي ڪرسي بچائڻ لاءِ منشيات فروشن، پڪي جي ڌاڙيلن، سياسي ماڻهن، ڪامورن، ايري گيري نٿو خيري کي سيڪيورٽي ڏيڻ لاءِ پوليس پيڪٽ، پوليس جون گاڏيون مقرر ڪري شهرين جي امن بجاءِ انهن جي خوشامد چاپلوسي ۾ پوليس لڳائي شهر جا روڊ رستا دهشت گردن ڦورن جي حوالي ڪيا وڃن ٿا، پوليس عوام جي ٽيڪس تي هلي اتان عوام جي ٽيڪس سبب انهن کي پگهار، ٿاڻا ملن ٿا، پوليس وٽ صرف سدائين اهو بهانو ته صاحب گشت تي ويل آهي. جڏهن به ڪنهن ٿاڻي تي ڪنهن عوام جو ڪم پوندو ايس ايڇ او لاءِ پڇا ڪئي وڃي ملاقات لاءِ ته چيو ويندو آهي ته صاحب گشت تي ويل آهي يا وري ڊي ايس پي ۽ ايس ايس پي صاحب لاءِ چيو ويندو آهي ته صاحب ميٽنگ ۾ مصروف آهي. اهي گشت ۽ ميٽنگون 1947ع کان هن وقت تائين هلندڙ الائي ڪڏهن گشت ۽ ميٽنگون کٽنديون ؟. خدارا لاڙڪاڻو شهر جي عوام کي بدامني جي باهه مان نجات ڏياريو ۽ پ پ قيادت پنهنجي لاڙڪاڻي شهر جي حقيقي مالڪي جو حق ادا ڪيو وڃي.
0 تبصرے