فاطمه مجيد فشرمين ڪوآپريٽو سوسائٽي جي چيئرپرسن ۽ سليم ديدڪ وائيس چيئرمين مقرر

فاطمه مجيد پاران مهاڻن جي ڀلائي، ترقي ۽ ڀارتي جيلن مان قيدين جي آزادي لاءِ جدوجهد جو اعلان

ملير (رپورٽ: عبدالرشيد مورجھريو)فاطمه مجيد فشرمين ڪوآپريٽو سوسائٽي جي چيئرپرسن طور ڪامياب ٿي وئي آهي جڏهن ته سليم ديدڪ وائيس چيئرمين چونڊجي ويو هي پهريون موقعو آهي جو سوسائٽي جي چيئرمين شپ ڪنهن عورت حوالي ڪئي وئي آهي.پيپلز پارٽي جي چيئرمين بلاول ڀٽو زرداري ۽ ليڊيز ونگ جي صدر فريال ٽالپر پاران چيئرپرسن لاءِ نامزد ڪيل فاطمه مجيد جي ڊائريڪٽرز ۽ عملي سان تعارفي گڏجاڻي ٿي، جنهن کانپوءِ باقاعدي طور اليڪشن عمل ڪيو ويو. 15 مان 14 ڊائريڪٽرز شريڪ ٿيا، جن هٿ کڻي فاطمه مجيد کي چيئرپرسن ۽ سليم ديدڪ کي وائيس چيئرمين چونڊيو اليڪشن ۾ ووٽ ڏيندڙ ڊائريڪٽرز ۾ شهزاد ڄاموٽ، عبدالناصر، سيد نور علي، حاجي احمد، فيصل خالد، لال بخش، عبدالستار، عبدالرشيد، محمد يوسف، سليم ديدڪ، فاطمه مجيد، محمد شڪيل ۽ ٻيا شامل هئا، جڏهن ته ڊائريڪٽر پرويز احمد غير حاضر رهيو. سيڪريٽري فشريز عمران شيخ ۽ سوسائٽي سان لاڳاپيل اهم اڳواڻ پڻ موجود هئا چونڊ عمل مڪمل ٿيڻ کان پوءِ سياسي ۽ سماجي اڳواڻن ۾ سهيل ڄاموٽ، عزيز داؤد جت، پ پ پ ملير پي ايس 87 جي صدر جان عالم ڄاموٽ، چيئرمين مبارڪ سنگو ۽ مهاڻن جي تنظيمن جا اڳواڻ پڻ شرڪت ڪري چيئرپرسن فاطمه مجيد کي مبارڪون ڏنيون. ان کان اڳ کين دهل شرنائين سان چيئرمين آفيس تائين آندو ويو، جتي شاندار آجيان ڪئي وئي.مهاڻن جي ڀلائي لاءِ ڪم ڪنديس:چيئرپرسن بڻجڻ کان پوءِ فاطمه مجيد چيو ته هن عهدي تي ڪنهن عورت جو پهريون ڀيرو اچڻ پيپلز پارٽي جي قيادت جو تاريخي فيصلو آهي. هن بلاول ڀٽو زرداري، فريال ٽالپر ۽ ٻين اڳواڻن جا ٿورا مڃيا.فاطمه مجيد چيو ته هوءَ مهاڻن جي ڀلائي، سندن ترقي ۽ عالمي سطح تي کين عزت ڏيارڻ لاءِ جدوجهد ڪندي. هن ٻڌايو ته سنڌ جا ڪيترائي مهاڻا ڀارتي جيلن ۾ قيد آهن ۽ هوءَ پاڻ به هڪ قيدي جي ڌيءَ آهي، تنهن ڪري قيدين جي آزادي لاءِ آواز اٿارڻ سندس اوليت آهي. هن وڌيڪ چيو ته مهاڻن جي زندگي بدلائڻ، عالمي معيار سان همڪنار ڪرڻ ۽ يورپي يونين جي پابندين جي زنجير ٽوڙڻ سندس مشن آهي اهي سڀئي چيلينجز اسان مڪمل ڪري ڏيکارينداسين.