فاطمه مجيد کي فشرمين ڪوآپريٽو سوسائٽي جي چيئرپرسن مقرر ڪرڻ جو فيصلو

پ پ چيئرمين بلاول ڀٽو زرداري فشرمين ڪوآپريٽو سوسائٽي جي ڊائريڪٽرس ۽ لاڳاپيل آفيسرن کي هدايت جاري ڪري ڇڏي

ملير(رپورٽ: عبدالرشيد مورجھريو) پاڪستان پيپلزپارٽي جي چيئرمين بلاول ڀٽو زرداري فشرمين ڪوآپريٽو سوسائٽي جي ڊائريڪٽرس ۽ لاڳاپيل آفيسرن کي واضح هدايت جاري ڪري ڇڏي آهي ته ابراهيم حيدري سان تعلق رکندڙ ماهيگير ڇوڪري ۽ سماجي اڳواڻ فاطمه مجيد کي سوسائٽي جي چيئرپرسن مقرر ڪيو وڃي.1945ع ۾ مهاڻن جي ڀلائي لاءِ ٺهيل هي تنظيم ڊگهي عرصي کان قيادتي بحران جو شڪار هئي، جڏهن ته 19 اپريل تي ٿيل ڊائريڪٽرن جي چونڊ کانپوءِ به چيئرمين جي مقرري جو معاملو التوا هيٺ هو. بلاول ڀٽو زرداري پاران آخري فيصلي کانپوءِ ڪراچي سميت سنڌ جي ساحلي علائقن جي مهاڻن ۾ خوشي جي لهر ڇانئجي وئي آهي.باخبر ذريعن موجب، پيپلزپارٽي چيئرمين گهڻي سوچ ويچار کانپوءِ وڏيرن ۽ مالدار حلقن جي اعتراض کي رد ڪندي هڪ تجربيڪار ۽ باعمل ماهيگير ڇوڪري جي حق ۾ فيصلو ڪيو آهي سومر ڏينهن سوسائٽي جي بورڊ آف ڊائريڪٽرس جو اجلاس متوقع آهي، جنهن ۾ فاطمه مجيد جي مقرري بابت باضابطه نوٽيفڪيشن جاري ڪيو ويندو.ياد رهي ته فاطمه مجيد اڳ ۾ به مهاڻن جي انساني ۽ بنيادي حقن لاءِ سرگرم رهي آهي، هوءَ ابراهيم حيدري کان اسلام آباد تائين لانگ مارچ ڪري چڪي آهي. هن وقت فاطمه مجيد ملیر ضلعي م پاڪستان پيپلزپارٽي لیدیز ونگ جي صدر ۽ ابراهيم حيدري ٽائون مان چونڊيل ليڊي ڪائونسلر پڻ آهي.