عمرڪوٽ ۾ ايس ٽي ايل ايف پاران نوجوانن جي تربيت مڪمل, موسميات جي حوالي سان عملي ڪم جي شروعات

عمرڪوٽ (رپورٽ:ڪانجي مل رکيسر)سيو دي لائيوز فائونڊيشن (STLF) ۽ برٽش ڪائونسل جي سهڪار سان عمرڪوٽ ضلعي ۾ پاڪستان يوٿ ليڊرشپ انيشيئيٽو (PYLI) تحت نوجوانن جا تربيتي ورڪشاپ منعقد ڪرايا ويا.سي اي او سيو دي لائيوز فائونڊيشن موجب ھڪڙي تربيت چار ڏينھن تي مشتمل ھئي، جڏھن ته اسين اھڙيون چار تربيتون ڪاميابي سان ڪرائي چڪا آھيون. چار ڏينهن تي ٻڌل تربيت ۾ ڳوٺاڻن علائقن جا نوجوان شامل ٿيا، جتي کين موسمياتي تبديليءَ بابت ڄاڻ ۽ اڳواڻيءَ جي عملي مهارتن بابت سکيا ڏني ويئي.سي اي او ڪنھيا موھن ميڊيا سان ڳالھائيندي چيو ته مذڪورہ تربيت صفائي، پاڻي جي بچت، قابل تجديد توانائي، وڻن جي پوک ۽ اسڪولن ۽ ڪاليجن ۾ موسمي تبديلي جي باري ۾ آگاھي ڏيڻ تي مشتمل ھئي.سندس وڌيڪ چوڻ ھو ته شيڊيول مطابق ڪل ست تربيتي ورڪشاپ ڪرڻا ھئا جن مان چار ورڪشاپ ڪاميابيءَ سان مڪمل ٿي چڪا آھن ۽ تربيت يافتہ نوجوان پنهنجي علائقن ۾ عملي قدم کڻڻ لاءِ تيار آهن، جنهن ۾ وڻ پوکڻ، پاڻي بچائڻ ۽ ٻين پنجن موضوعن تي عملدرآمد شامل آهي. ايس ٽي ايل ايف جي سي اي او انجنيئر ڪنيا موهن لال وڌيڪ چيو ته: “هي نوجوان مستقبل جا اميد جوڳا اڳواڻ آهن، جيڪي پنهنجي علائقن ۾ تبديلي آڻڻ لاءِ اڳتي وڌي رهيا آهن. سندن قدم ٿر ۽ عمرڪوٽ کي وڌيڪ صاف سٿرو ۽ خوبصورت بڻائيندا.” ان منصوبي تحت مجموعي طور تي 210 نوجوانن کي تربيت ڏني ويندي، جيڪي مستقبل ۾ موسمياتي اڳواڻ طور پنهنجو ڪردار ادا ڪندا. جڏھن ته تربيت دوران ايم پي اي ھمير سنگھ سوڍا ۽ ڊپٽي ڪمشنر عمرڪوٽ نويد الرحمان لاڙڪ پاران دورو پڻ ڪيو ويو، جن تنظيم جي منفرد انداز ۾ ڪم ڪرڻ تي ساراهيو ۽ نوجوانن جي پڻ ھمت افزائي ڪئي ويئي.