ٺٽو ميونسپل آفيس سامهون فائرنگ ۾ واپاري سميت 2 ڄڻا زخمي

عرفان بروهي جي فائرنگ ۾ واپاري محمد عالم بروهي ۽ اسحاق بروهي زخمي ٿي پيا

ٺٽو ( محمد شفيق ڀٽي ) ٺٽو شهر جي مرڪزي چوڪ، ميونسپل ڪميٽي آفيس جي سامهون بدمست نوجوان عرفان ولد غلام قادر بروهي اندهاڌنڌ فائرنگ ڪري بخاري محلي جي رهواسي ۽ چوپائي مال جي واپاري محمد عالم بروهي کي سخت زخمي ڪري ڇڏيو، جڏهن⁠ تہ فائرنگ ۾ ٻيو نوجوان اسحاق بروهي به زخمي ٿي پيو۔ فائرنگ دوران واپاري جي هڪ بڪري به گولي لڳڻ سبب مري ويئي۔اکين ڏٺن شاهدن موجب بااثر نوجوان عرفان بروهي کلي عام فائرنگ ڪندو رهيو، جڏهن⁠ تہ ٻن موبائلن ۾ موجود پوليس اهلڪار خاموش تماشائي بڻيل رهيا ۽ زخمي نوجوانن کي ريسڪيو به نه ڪيو۔ بعد ۾ شهرين پنهنجي مدد پاڻ تحت زخمين کي موٽر سائيڪل تي اسپتال منتقل ڪيو۔ذريعن جو چوڻ آهي ته واقعو گذريل رات ڪبوترن جي چوري واري تڪرار سبب پيش آيو، جڏهن رات ڪبوتر چوري ڪري ڀڄي ويل شخص کي اڄ ڏينهن جو عالم بروهي پڪڙيو، جنهن تان مڇرجي عرفان بروهي فائرنگ ڪري ٻنهي بروهي نوجوانن کي زخمي ڪري وڌو۔ايس ايس پي ٺٽو واقعي جو سخت نوٽيس وٺندي لاڳاپيل عملدارن کي ملزم عرفان بروهي جي فوري گرفتاري جا حڪم جاري ڪري ڇڏيا آهن، جڏهن⁠ تہ جوابدار جي گرفتاري لاءِ پوليس جا ڇاپا جاري آهن۔