مدئجي ڀرسان مبينا مقابلي ۾ هڪ پوليس اهلڪار زخمي

شڪارپور(احسان ابڙو )شڪارپور جي مدئجي ڀرسان نئون امروٽ ٿاڻي جي حد ڳڙهي ياسين لنڪ روڊ رڪ پمپنگ اسٽيشن وٽ پوليس ۽ هٿياربندن ۾ مبينہ پوليس مقابلو ٿيو، جنهن دوران هڪ بهادر پوليس اهلڪار زخمي ٿي پيو تفصيل موجب اسڪول جي وين ٻارڙن کي موڪل بعد گهر وٺي وڃي رهي هئي ته موٽرسائيڪل سوار هٿياربندن ان جو پيڇو ڪيو. اهڙي صورتحال ۾ امروٽ پوليس جي گشتي ٽيم بروقت پهچي، هٿياربندن کي للڪاريو ته انهن فائرنگ شروع ڪري ڇڏي. پوليس جوانن بهادريءَ سان مقابلو ڪري هٿياربندن جي سازش ناڪام بڻائي ۽ معصوم ٻارڙن کي اغوا ٿيڻ کان بچائي ورتو مقابلي دوران پوليس جو دلير اهلڪار اسرار ڏانھيون گوليون لڳڻ سبب زخمي ٿي پيو، جنهن کي فوري طور لکي اسپتال مان طبي امداد ڏئي ضياءُ الدين اسپتال سکر منتقل ڪيو ويو. ايس ايڇ او جهانزيب خان ميمڻ موجب پوليس جوانن جو حوصلو بلند آهي ۽ ڪنهن به ڏوهاري کي قانون کان مٿانهون ٿيڻ نه ڏنو ويندو.ٻئي طرف واقعي واري هنڌ وڏي پوليس نفري پهچي وئي ۽ علائقي ۾ سرچ آپريشن شروع ڪري ڏوهارين کي ڳولڻ لاءِ گهيرا تنگ ڪيو ويو آهي.