ابراهيم حيدري ۾ سوئي سدرن گيس ڪمپني جو آپريشن، غيرقانوني ڪنيڪشن ڪاٽا

1000گهرن جا غيرقانوني گيس ڪنيڪشن ڪاٽا، لکين رپين جو نقصان روڪيو ويو

ملير (رپورٽ: عبدالرشيد مورجھريو) ملير ضلعي جي علائقي ابراهيم حيدري، ايم ايم ڪالوني ۾ سوئي سدرن گيس ڪمپني (SSGC) پاران گيس چوري خلاف وڏي ڪارروائي ڪئي وئي جنهن دوران 1000 گهرن جا غيرقانوني گيس ڪنيڪشن ڪاٽيا ويا۔ذريعن موجب علائقي ۾ چوري ٿيل گيس جي فراهمي مخصوص ماڻهن جي ذريعي جاري هئي جيڪي هر گهر کان ماهوار 2000 رپيا وصول ڪندا هئا۔ ان غيرقانوني فراهمي سبب سوئي گيس ڪمپني کي هر مهيني لکين رپين جو نقصان پهچايو پيو وڃي ڪمپني جي عملدارن ڪارروائي دوران غيرقانوني ڪنيڪشن ختم ڪري باقي علائقي ۾ گيس جي فراهمي بحال ڪري ڇڏي۔ آپريشن دوران گهرن کي سپلائي ڏيڻ لاءِ استعمال ٿيندڙ ڪيترائي پائپ ۽ ٻيا سامان ضبط ڪيا ويا سوئي سدرن گيس ڪمپني موجب ڪجهه ڏينهن اڳ به ابراهيم حيدري الیاس ڳوٺ ۾ ساڳي نوعيت جي ڪارروائي ڪئي وئي هئي، جنهن ۾ گهڻا غيرقانوني ڪنيڪشن ختم ڪيا ويا هئا ڪمپني جي ترجمان موجب اڄ جي ڪارروائي گيس چورن خلاف ٻئي وڏي مهم جو حصو آهي۔ وڌيڪ ڪارروائي لاءِ پوليس ۽ گيس ڪمپني جون گڏيل ٽيمون علائقي ۾ گشت ڪري رهيون آهن، ته جيئن ملوث ماڻهن خلاف مزيد قدم کنيا وڃن ۽ مقدما داخل ڪري سگهجن۔