گلشن حديد ۾ ڌارين جي آبادڪاري، زمينن تي والار ۽ ترقي جي نالي ۾ تباهي خلاف ميڙاڪو

سنڌ انڊيجيئنس رائيٽس الائنس جي ميڙاڪي ۾ سياسي سماجي اڳواڻن ۽ اديبن وڏي انگ ۾ شرڪت ڪئي

ملير (رپورٽ: عبدالرشيد مورجھريو) سنڌ انڊيجينيس رائيٽس الائنس طرفان گلشن حديد ۾ ڌارين جي آبادڪاري، زمينن تي والار ۽ ترقي جي نالي ۾ ٿيندڙ تباهي خلاف ميڙاڪومنعقد ڪيو ويو، جنهن ۾ سول سوسائٽي، سياسي ۽ سماجي اڳواڻن، اديبن، دانشورن ۽ علائقي واسين وڏي تعداد ۾ شرڪت ڪئي ميڙاڪي ۾ نامور شخصيتن خداڏنو شاھ، عبدالخالق خالق جوڻيجو،عثمان بلوچ خير محمد مگسي، معين مگسي، حفيظ بلوچ، ولي ناريجو، اصغر باغي ۽ عاشق بهليم خطاب ڪندي چيو ته سنڌ جي وسيلن تي ڌارين جي والار ۽ جعلي ترقياتي منصوبن جي نالي ۾ تباهي مقامي ماڻهن جي بقا ۽ سڃاڻپ لاءِ وڏو خطرو بڻجي چڪي آهي.مقررن چيو ته زرعي زمينون ۽ قدرتي وسيلا تباهه ڪري نه رڳو مقامي ماڻهن جي روزگار ۽ ماحوليات کي نقصان پهچايو پيو وڃي پر سنڌ جي اصل رهاڪن کي بيدخل ڪرڻ جي سازش به هلي رهي آهي. هنن زور ڏنو ته سنڌ جي زمين، پاڻي ۽ وسيلن تي سڀ کان پهريان مقامي ماڻهن جو حق آهي ۽ ڪنهن به صورت ۾ انهن حقن تان هٿ کڻڻ منظور نه آهي.اديبن ۽ سياسي اڳواڻن چيو ته هاڻوڪي پاليسين سبب ڳوٺ تباهه ٿي رهيا آهن، زميندار ۽ هاري اجڙجي رهيا آهن، جڏهن ته تعليم ۽ ترقي جا نعرا رڳو ڌوڪو آهن. هنن مطالبو ڪيو ته ڌارين جي آبادڪاري ۽ زمينن تي والار خلاف فوري قدم کنيا وڃن ۽ مقامي ماڻهن کي پنهنجي وسيلن تي مالڪي جو حق ڏنو وڃي ميڙاڪي جي پڄاڻيءَ تي قرارداد منظور ڪئي وئي جنهن ۾ اعلان ڪيو ويو ته سنڌ جي زمينن ۽ وسيلن تي والار خلاف جدوجهد جاري رهندي ۽ سول سوسائٽي، سياسي پارٽيون ۽ عوام گڏجي پنهنجا حق بچائيندا.