لاڙڪاڻو: رحمت پور ٿاڻي جي حد ۾ گهرو اڻبڻت تان نوجوان ناري مڙس هٿان قتل، جوابدار گرفتار

ڳوٺ جڙيو چانڊيو ۾ اياز ڏيٿو گهرو اڻبڻت تان پنهنجي نوجوان زال نصيبا کي ڪهاڙيون هڻي قتل ڪري ڇڏيو

لاڙڪاڻو (بيورو) رحمت پور ٿاڻي جي حد ڳوٺ جڙيو چانڊيو ۾ گهرو اڻبڻت تان جوابدار مڙس پنهنجي گهر واري نصيبه ڏيٿو کي ڪهاڙيون هڻي قتل ڪري ڇڏيو واقعي بعد جوابدار فرار ٿي ويو، اطلاع تي پوليس پهچي لاش کڻائي پوسٽ مارٽم لاءِ چانڊڪا اسپتال منتقل ڪري ڇڏيو . ان موقعي تي مقتولا عورت جي امڙ ڪلثوم ڏيٿو ٻڌايو ته منهنجي ڌيءَ کي سندس مڙس اياز ڏيٿو گهرو اڻبڻت تان ڪهاڙيون هڻي قتل ڪرڻ بعد سندس جا ٻار کڻي فرار ٿي ويو آهي جنهن منهنجي ننهن کي پڻ زخمي ڪيو آهي. هن مطالبو ڪيو ته ڄاٽي کي گرفتار ڪري انصاف فراهم ڪيو وڃي. ان حوالي سان پوليس جو چوڻ آهي ته واقعو گهرو اڻبڻت تان پيش آيو آهي وڌيڪ جاچ ڪري رهيا آهيون. ٻي طرف رحمتپور ٿاڻي جي پوليس جوابدار مڙس اياز ڏيٿو کي گرفتار ڪري ورتو، جوابدار جو چوڻ هو ته جڳھ وڪرو ڪرڻ تان ساهرا ناراض هئا، سهري اسماعيل هڪ هزار روپيا گهريا، نه ڏيڻ تان هن جهيڙو ڪيو ، سهري اسماعيل ڏنڊو هنيو تہ مون ڪهاڙيء کنئي، وچ ۾ ڇڏائڻ دوران گهرواري کي ڪهاڙي لڳي وئي، پوليس جو چوڻ هو ته جوابدار کي گرفتار ڪيو آهي، فريادي جي اچڻ کانپوءِ ڪيس داخل ڪنداسين، اڄ صبح جو گهريلو اڻبڻت تان جوابدار ڪهاڙين جا وار ڪري گهر واري کي قتل ڪيو هو