صدر آصف زرداری سے فیلڈ مارشل کی ملاقات، ملکی سیکیورٹی صورتحال پر گفتگو

فیلڈ مارشل نے صدر کو ملک کی مجموعی داخلی و خارجی سیکیورٹی صورتحال پر بریفنگ دی

اسلام آباد (ویب ڈیسک) صدر آصف علی زرداری سے فیلڈ مارشل سید عاصم منیر نے ملاقات کی، جس دوران صدر اور فیلڈ مارشل نے ملک کی داخلی و خارجی سیکیورٹی صورتحال پر تبادلہ خیال کیا۔ ایوانِ صدر سے جاری اعلامیے کے مطابق، آرمی چیف سید عاصم منیر نے صدر آصف علی زرداری سے ایوانِ صدر میں ملاقات کی۔ ملاقات کے دوران فیلڈ مارشل نے صدر کو ملک کی مجموعی داخلی و خارجی سیکیورٹی صورتحال پر بریفنگ دی۔ فیلڈ مارشل نے صدر کو افغان طالبان حکومت کی جارحانہ اور اشتعال انگیز کارروائیوں اور اس کے بعد پیدا ہونے والی تازہ سیکیورٹی صورتحال سے بھی آگاہ کیا۔ فیلڈ مارشل نے افغان طالبان حکومت کی جارحیت کے جواب میں پاک فوج کی محتاط اور مؤثر کارروائیوں سے بھی صدر کو آگاہ کیا۔ اعلامیے کے مطابق، صدر نے پاک فوج کی قوت، بہادری، صلاحیت اور تیاری پر مکمل اعتماد کا اظہار کیا۔ صدر نے ملکی سرحدوں کے دفاع کے لیے پاک فوج کی چوکسی اور مہارت کی تعریف کی۔ صدر نے افغان بارڈر پر سرحد پار حملوں کے فوری اور پیشہ ورانہ جواب پر بھی پاک فوج کی مہارت کو سراہا۔ صدر کا کہنا تھا کہ پاکستان اپنی قومی خودمختاری اور علاقائی سالمیت کے تحفظ کے لیے ہر ممکن قدم اٹھائے گا۔