ملير: شاهه لطيف ٽائون ۾ سوئي سدرن گيس انتظاميا جو آپريشن، مزاحمت، پوليس آفيسر زخمي، ڪيترا ئي گرفتار

سوئي سدرن گيس ڪمپني جي ٽيم پاران غيرقانوني ڪنيڪشنن خلاف آپريشن دوران علائقي واسين پاران مزاحمت ڪئي وئي

ملير (رپورٽ: عبدالرشيد مورجھريو) ملير جي شاهه لطيف ٽائون واري علائقي ۾ سوئي سدرن گيس ڪمپني جي ٽيم غيرقانوني گيس ڪنيڪشن خلاف آپريشن ڪيو ته علائقائي رهواسين سخت مزاحمت شروع ڪري ڏني مزاحمت دوران هنگامي صورتحال پيدا ٿي وئي، پٿراءُ ۽ فائرنگ جا واقعا ٿيا جنهن جي نتيجي ۾ پوليس جو هڪ آفيسر زخمي ٿي پيو.ذريعن موجب، سوئي سدرن گيس ڪمپني جي ٽيم غيرقانوني ڪنيڪشن ڪٽڻ لاءِ پهتي هئي، جنهن تي رهواسين آپريشن روڪڻ جي ڪوشش ڪئي. مڇريل ماڻهن آپريشن ٽيم ۽ پوليس تي پٿراءُ ڪيو ۽ هوائي فائرنگ پڻ ڪئي. صورتحال تي ضابطو آڻڻ لاءِ پوليس لاٺي چارج ۽ فائرنگ ڪري هجوم کي منتشر ڪري ڇڏيو واقعي دوران علائقي ۾ خوف ۽ حراس پکڙجي ويو، مارڪيٽون ۽ دڪان بند ٿي ويا. زخمي پوليس آفيسر کي اسپتال منتقل ڪيو ويو، جتي ڊاڪٽرن سندس حالت خطري کان ٻاهر قرار ڏني پوليس جو چوڻ آهي ته آپريشن دوران ڪيترائي غيرقانوني ڪنيڪشن ختم ڪيا ويا آهن، جڏهن ته واقعي ۾ ملوث ماڻهن جي نشاندهي ڪري سندن خلاف مقدمو داخل ڪيو پيو وڃي. ٻئي طرف رهواسين جو مؤقف آهي ته گيس ڪمپني بنا اطلاع ۽ متبادل بندوبست اچانڪ آپريشن ڪيو، جنهن سبب ڇڪتاڻ پيدا ٿي پوليس دعويٰ ڪئي آهي ته صورتحال تي مڪمل طور تي ضابطو آڻي علائقي ۾ امن امان بحال ڪيو ويو آهي، پر ڇڪتاڻ جي سبب پوليس جي ڳري نفري تائين علائقي ۾موجودرهي۔