ملير: رزاق آباد جي غريب آباد پاڙي ۾ پورهيت جي گهر ۾ ڌاڙو

هٿياربند پيارو ڪلمتي جي گهر ۾ گهڙي گهرڀاتين کي يرغمال بڻائي تشدد جو نشانو بڻايو: متاثر

ملير (رپورٽ: عبدالرشيد مورجھريو) گذريل رات دير سان ٽن هٿياربندن رزاق آباد جي غريب آباد پاڙي ۾ پورهيت پيارو ڪلمتي جي گهر ۾ گهڙي ڌاڙو هنيو ان سلسلي ۾ گهر مالڪ پيارو ڪلمتي جو چوڻ هو ته هٿياربندن گهر ۾ داخل ٿيندي ئي گهرڀاتين کي يرغمال بڻائي تشدد جو نشانو بڻايو ان دوران هٿياربندن گهر ۾ موجود چار لک روڪ رقم، سون ۽ قيمتي سامان کڻي فرار ٿي ويا. تشدد سبب گهرڀاتين کي شديد ذهني ۽ جسمي تڪليف پهتي جڏهن ته رزاق آباد ۾ خوف ۽ ڏهڪاءُ ڇانئجي ويو آهي اطلاع تي علائقي معزز اڪبر ڪلمتي، فيض سنڌي ،شيراز سولنگي، اقبال ڪلمتي، وهاب گبول صدام ڪلمتي ۽ ٻيا پهچي ويا جن سخت احتجاج ڪندي واقعي جي سخت مذمت ڪئي ميڊيا سان ڳالهائيندي هنن چيو ته علائقي ۾ ڪجهه وقت کان وارداتن ۾ واڌارو ٿي ويو آهي پر پوليس روائتي “ڪاروائي” ۾ لڳل آهي ۽ واقعي کان پوءِ به ڪا به اهم اڳڀرائي يا گرفتاري سامهون نه آئي آهي. ماڻهن جو چوڻ آهي ته پوليس واقعي کان پوءِ “نانگ ويو نڪري” واري روايتي طريقي تي هلي رهي آهي، جنهن سبب ڏوهارين جا حوصلا بلند ٿين ٿا.رهواسين مطالبو ڪيو آهي ته واقعي ۾ ملوث هٿياربندن کي جلد کان جلد گرفتار ڪري سخت سزا ڏني وڃي ۽ علائقي ۾ گشت وڌائي ماڻهن کي تحفظ فراهم ڪيو وڃي ته جيئن اهڙا واقعا ٻيهر نه ٿين.