گھارو ۾ رياض ناھيو جي آزادي لاءِ شهرين جو ڌرڻو، شٽر بند هڙتال، ڇتي نعريبازي

شھرين پاران رياض ناھيو جي آزادي لاءِ پرامن ڌرڻو هنيو ويو، سياسي سماجي تنظيمن جا اڳواڻ به شريڪ

ٺٽو( محمد شفيق ڀٽي) گھارو گولائيءَ تي شھرين پاران رياض ناھيو جي آزادي لاءِ پرامن ڌرڻو جاري آهي، جنهن ۾ سياسي، سماجي تنظيمن سان گڏ وڏي انگ ۾ شهرين، ڪارڪنن، هارين، مزدورن ۽ واپارين پڻ شرڪت ڪري رياض ناھيو جي حمايت ۾ نعريبازي ڪئي۔ شرڪت ڪندڙ شهرين هٿن ۾ پلي ڪارڊ ۽ بئنر کڻي "رياض ناھيو کي آزاد ڪيو" جا نعرا هڻندي ڀرپور احتجاج ڪيو۔ سندن چوڻ هو ته گھارو جو رهواسي رياض ناھيو کي بنا ڪنهن جواز جي حراست ۾ ورتو ويو آهي، جيڪو سراسر زيادتي ۽ انساني حقن جي ڀڃڪڙي آهي۔ ڌرڻي ۾ شرڪت ڪندڙن جو چوڻ هو ته جيستائين رياض ناھيو کي آزاد نه ڪيو ويندو تيستائين احتجاج ۽ ڌرڻو جاري رهندو۔ ساڳئي وقت شهر جي مختلف علائقن ۾ شٽر بند هڙتال به ڪئي وئي، جنهن سبب ڪاروباري مرڪز مڪمل طور بند رهيا ۽ شھر جي مرڪزي علائقن ۾ ماحول گرمايل رهيو۔ عوامي احتجاج کي ڏسندي پوليس ۽ انتظاميا به الرٽ حالت ۾ رھي۔