ملير ڪينٽ ٿاڻي جي حد ۾ ٻه معصوم ٻارڙا بيٺل پاڻي ۾ ٻڏي فوت، علائقي واسين جو احتجاج

بختاور ڳوٺ ۾ حارث ولد عبدالغفار ۽ مريد حسين راند کيڏڻ دوران کڏ ۾ ڪِري ٻڏي ويا

ملير (رپورٽ: عبدالرشيد مورجھريو) ملير ڪينٽ ٿاڻي جي حد مگسي چوڪ ڀرسان پلاٽ ۾ اڏاوت دوران پاڻيءَ جي جمع ٿيل کڏ ۾ ٻه معصوم ٻار ٻڏي فوت ٿي ويا . پوليس موجب بختاور ڳوٺ جا ٻه ٻارڙا حارث ولد عبدالغفار ۽ مريد حسين ولد عبدالمنير ـ راند ڪندي بيخبريءَ ۾ ان کڏ ۾ ڪري پيا ۽ پاڻيءَ ۾ ٻڏي فوت ٿي ويا پوليس اطلاع ملڻ تي فوري طور واقعي واري هنڌ پهتي ۽ ٻارڙن کي ايمبولينس ذريعي اسپتال منتقل ڪيو، جتي ڊاڪٽرن سندن موت جي تصديق ڪئي. پوليس موجب، اها کڏ هڪ نئين تعمير ٿيندڙ پلاٽ جي آهي، جنهن ۾ پاڻي گڏ ٿي ويو هو ۽ حفاظتي انتظام نه هئڻ سبب هي حادثو پيش آيو حادثي کان پوءِ علائقي ۾ ڪاوڙ ۽ ڏک جي لهر پکڙجي وئي جڏهن ته رهواسين انتظاميا ۽ مالڪن جي لاپرواهي خلاف احتجاج ڪيو. مقامي ماڻهن جو چوڻ هو ته ٺهندڙ پلاٽن، کوٽائن ۽ کڏن تي حفاظتي واڙ يا نشانيون نه هجڻ سبب ٻارن ۽ رهواسين لاءِ خطرو پيدا ٿيو آهي هنن جو چوڻ هو ته اسان ڪيترائي ڀيرا انتظاميا کي خبردار ڪيو پر ڪنهن به ڌيان نه ڏنو رهواسين مطالبو ڪيو آهي ته علائقي ۾ سڀني اڻپوري تعميراتي هنڌن کي فوراً محفوظ ڪيو وڃي، کڏن کي ڀريو يا باڙ هڻي بند ڪيو وڃي ۽ خطرناڪ هنڌن تي خبردار ڪندڙ بورڊ لڳايا وڃن ته جيئن اهڙا انڌوهناڪ حادثا ٻيهر نه ٿين. ساڳئي وقت رهواسين انتظاميا کان مطالبو ڪيو ته فوت ٿيل ٻارن جي وارثن سان مالي مدد ۽ انصاف ڪيو وڃي.