ملير: ڪاٺوڙ ۽ ڀرپاسي جي 60 کان وڌيڪ ڳوٺن جي 26 ڏينهن کان بجلي بند

ٻن مهينن کان بجلي بند هجڻ سبب پيئڻ جي پاڻيءَ جو شديد بحران پيدا ٿي ويو آهي: رهواسي

ملير (رپورٽ: عبدالرشيد مورجھريو) ڪاٺوڙ ۽ ڀرپاسي جي لڳ ڀڳ 60 ڳوٺن ۾ 26 ڏينهن کان بجلي بند هجڻ سبب رهواسين جو صبر جواب ڏئي ويو ان سلسلي م ڳوٺاڻن ڪاٺوڙ شهر کان موٽر وي تائين احتجاجي ريلي ڪڍي جنهن جي اڳواڻي جان شير جوکيو، غفار ڪاڇيلو، طارق بلوچ، فريد بلوچ، خادم ڇٽو ۽ حاجي امير جوکيو ڪري رهيا هئا احتجاج ۾ شرڪ ڪندڙن ڪي اليڪٽرڪ انتظاميا خلاف سخت نعريبازي ڪئي. احتجاج ڪندڙن جو چوڻ هو ته ڪي اليڪٽرڪ انتظاميا ظلم جي انتها ڪري ڇڏي آهي، مهينن کان بجلي بند هجڻ سبب پيئڻ جي پاڻيءَ جو شديد بحران پيدا ٿي ويو آهي، روزگار ۽ ڪاروباري سرگرميون بُري طرح متاثر ٿي رهيون آهن، جڏهن ته ماڻهو باقاعدگي سان بجلي جا بل ڀرين ٿا پر انهن کي بجلي کان محروم رکيو وڃي ٿو احتجاج ڪندڙن وڌيڪ چيو ته جڏهن هو موٽر وي تي احتجاج ڪن ٿا ته سندن خلاف ڪيس داخل ڪيا وڃن ٿا، پر مسئلو حل نٿو ٿئي. هنن خبردار ڪيو ته جيڪڏهن 3 ڏينهن اندر بجلي بحال نه ڪئي وئي ته موٽر وي مڪمل طور بند ڪئي ويندي ۽ احتجاج کي وڌيڪ وسيع ڪيو ويندو احتجاج ڪندڙ رهواسين جو مطالبو هو ته فوري طور تي بجلي جي فراهمي بحال ڪئي وڃي ۽ ڪي اليڪٽرڪ انتظاميا کي ڳوٺاڻن جي بنيادي ضرورتن کي نظرانداز ڪرڻ کان روڪيو وڃي.