ملير جي شاھ لطيف ٽائون ۾ بدامني خلاف شهرين جي امن ريلي

بدامني ۽ منشيات جي واپار جهڙن مسئلن شهرين جو ساھ سڪائي ڇڏيو آهي: اڳواڻ

ملير (رپورٽ: عبدالرشيد مورجھريو) شاھ لطيف ٽائون ۾ وڌندڙ بدامني، ڏوهاري سرگرمين ۽ عوامي مسئلن خلاف شهرين پاران وڏي پيماني تي امن ريلي ڪڍي وئي. ريلي ۾ مختلف علائقن مان آيل وڏي انگ ۾ مرد، عورتن ۽ نوجوانن شرڪت ڪئي. شهرين ايڊووڪيٽ اعجاز منگي جي اڳواڻي ۾ امن ريلي ڪڍي وئي جنهن دوران شرڪت ڪندڙن هٿن ۾ بينر ۽ پلي ڪارڊ کڻي “امن قائم ڪريو”، “شاھ لطيف ۾ امن امان بحال ڪيو” جهڙا نعرا هنيا شرڪت ڪندڙن جو چوڻ هو ته شاھ لطيف ٽائون ۾ بدامني سبب رهواسي سخت پريشانيءَ ۽ خوف واري فضا ۾ زندگي گذارڻ تي مجبور آهن، ڏوهاري سرگرمين، ڦرن، چورين ۽ منشيات جي واپار جهڙن مسئلن شهرين جو ساھ سڪائي ڇڏيو آهي. هنن وڌيڪ چيو ته علائقي ۾ قانون نافذ ڪندڙ ادارا پنهنجو ڪردار ادا ڪن ته جيئن عام ماڻهو بنا خوف جي جيئڻ جي قابل ٿي سگهن.شرڪت ڪندڙ شهرين جو مطالبو هو ته فوري طور تي شاھ لطيف ٽائون ۾ امن امان جي صورتحال بهتر ڪئي وڃي، پوليس جو گشت وڌايو وڃي، ڏوهارين خلاف ڪاروائيون تيز ڪيون وڃن ۽ بنيادي عوامي مسئلا حل ڪيا وڃن ته جيئن رهواسين کي سک جو ساھ ملي سگهي ايڊووڪيٽ اعجاز منگي ريلي کي خطاب ڪندي چيو ته علائقي جي عوام پنهنجي حقن ۽ امن لاءِ گڏ آهي، ۽ هو وقتي ڪارروائين بدران مستقل حل جو مطالبو ڪري رهيا آهن.