6 ڪروڙ کان وڌيڪ ماڻھو غربت جي لڪير کان ھيٺ زندگي گذارڻ تي مجبور واري رپورٽ ڳڻتي جوڳي آهي: اياز لطيف پليجو

اياز لطيف پليجي پاران پاڪستان ۾ غربت بابت ورلڊ بئنڪ جي رپورٽ تي ڳڻتي ظاهر

حيدرآباد(بيورو)قومي عوامي تحريڪ جي سربراھ اياز لطيف پليجي پاڪستان ۾ 6 ڪروڙ کان وڌيڪ ماڻھو غربت جي لڪير کان ھيٺ زندگي گذارڻ واري ورلڊ بئنڪ جي رپورٽ تي ڳڻتي جو اظھار ڪندي چيو آھي تہ الميو آھي تہ حڪومتون تبديل ٿين ٿيون پر معاشي پاليسي تبديل نٿي ٿئي، جنھنڪري ھر حڪومت ۾ غربت جي شرح ۾ اضافو ٿيو آھي، حڪومت ورلڊ بئنڪ جي رپورٽ جي آئيني ۾ پنھنجي معاشي ڪارڪردگي ڏسي. معاشي پاليسيون پورھيت دشمن، ھاري دشمن ۽ جو غريب دشمن آھن، ملڪ جي دولت ۽ وسيلن تي حڪمران، سرمائيدار ۽ جاگيردار طبقي جو قبضو آھي، ھاري، مزدور، پورھيت بنيادي سھولتن سميت قانوني انساني حقن کان به محروم آھن. اياز لطيف پليجي چيو تہ غربت، بيروزگاري ۽ بدحالي انارڪي پيدا ڪندي آھي. حڪمران ٻين ملڪن ۾ خراب معاشي پاليسين سبب عوامي بغاوت مان سبق حاصل ڪن. موجود حڪمران خراب حڪمراني جو تسلسل ثابت ٿي آھي. سنڌ ۾ ٻين صوبن جي ڀيٽ ۾ وڌيڪ حالتون خراب آھن، ڪرپشن سمورن کاتن کي اڏوھي بنجي کائي کوکلو ڪري ڇڏيو آھي. صحت، تعليم، امن، روزگار سميت بنيادي سھولتون ناھن. مھانگائي ماڻھن کان 2 وقت جي ماني کسي ورتي آھي. زراعت جي تباھي سبب آبادگار ۽ ھاري بدترين حالتن جو شڪار آھن. لکين نوجوان بيروزگاري جو شڪار آھن، مايوسي سبب خودڪشين جا واقعا پيش اچن ٿا. سرڪاري تعليمي نظام درھم برھم آھي ۽ سرڪاري اسپتالن ۾ بھتر علاج جون سهولتون ناھن، جنھنڪري پرائيويٽ تعليمي سسٽم ۽ پرائيويٽ اسپتالون وڏو ڪاروبار بنجي ويو آھي. اياز لطيف پليجي چيو تہ حڪومت معاشي پاليسيون عوام دوست بنائي. ڪرپشن ۾ ملوث وزيرن ۽ ڪامورن کي گرفتار ڪيو وڃي. بنيادي سھولتون ۽ قانوني حق ڏنا وڃن.