نوشهروفيروز ۾ اسڪارپ ملازمن جو مبينه ڪرپشن خلاف احتجاجي لانگ مارچ شروع

انجنيئر جاويد ٽانوري جعلي بِل ٺاهي ڪروڙين رپين جي ڪرپشن ۾ ملوث آهي: ساگر يوسف منگي

نوشهروفيروز(ڊ ر)مبينه ڪرپشن خلاف اسڪارپ ملازمن جو احتجاجي لانگ مارچ شروع، خبر موجب اسڪارپ ايمپلائيز يونين جي سڏ تي ملازمن طرفان نوشهروفيروز مان احتجاجي پيادل لانگ مارچ شروع ڪيو ويو۔ لانگ مارچ ۾ ملازمن مبينه ڪرپشن ۽ انجنيئر جي زيادتين خلاف نعريبازي ڪندي مطالبو ڪيو ته شهيد اڳواڻ اقبال لاڙڪ جي قاتلن کي گرفتار ڪري وارثن کي انصاف فراهم ڪيو وڃي۔ يونين جي صدر ساگر يوسف منگي جو چوڻ هو ته انجنيئر جاويد ٽانوري ڪرپشن جو مرڪزي ڪردار آهي، جيڪو جعلي بِل ٺاهي ڪروڙين رپين جي ڪرپشن ۾ ملوث آهي۔ سيڪريٽري آبپاشي سميت لاڳاپيل عملدارن کي ثبوت ڏيڻ باوجود هن خلاف ڪا ڪارروائي نه ٿي آهي۔ ان موقعي تي آل سنڌ ٽريڊ يونين فيڊريشن جي صوبائي جنرل سيڪريٽري ياسر اقبال لاڙڪ چيو ته ڪروڙين رپين جي ڪرپشن سبب ضلعي ۾ 500 کان وڌيڪ ٽيوب ويل بند آهن، جنهن ڪري آبادگارن کي سخت نقصان پهچي رهيو آهي۔ هن اعلان ڪيو ته 5 آڪٽوبر تي هزارين ملازم حيدرآباد ۾ چيف انجنيئر ايريگيشن جي آفيس آڏو ڌرڻو هن ڪندا۔ ساگر يوسف منگي وڌيڪ ٻڌايو ته 600 کان وڌيڪ ٽيوب ويل بند ٿيڻ ۽ بجيٽ جي خردبرد خلاف وڏي پيماني تي احتجاج جاري آهي۔ ملازمن جو مطالبو آهي ته وزيراعليٰ سنڌ، گهرو وزير ۽ وزير آبپاشي ڪرپٽ مافياز خلاف فوري ڪارروائي ڪن۔ لانگ مارچ ڪندڙ ملازمن کي ضلعي بار ڪائونسل جي وڪيل برادري به مڪمل حمايت جو اعلان ڪندي ڊسٽرڪٽ ڪورٽ ڪامپليڪس پهچڻ تي پرجوش استقبال ڪيو۔