نوشهروفيروز جي ڳوٺ پنو سولنگي ۾ ريجنل ڊائريڪٽر محتسب اعليٰ پاران کلي ڪچهري

ڳوٺاڻن تعليم، صحت، روڊ، پبلڪ هيلٿ ۽ ٻين سرڪاري کاتن جي لاپرواهي بابت شڪايتون ڪيون

نوشهروفيروز (ڊ ر)ريجنل ڊائريڪٽر محتسبِ اعليٰ نوشهروفيروز خالد شيخ ڳوٺ پنو سولنگي ۾ کلي ڪچهري منعقد ڪري ڳوٺاڻن جا مسئلا ٻڌا. هن موقعي تي ڳوٺاڻن تعليم، صحت، روڊ، پبلڪ هيلٿ ۽ ٻين سرڪاري کاتن جي لاپرواهي بابت شڪايتون پيش ڪيون. ريجنل ڊائريڪٽر محتسبِ اعليٰ نوشهروفيروز خالد شيخ ڳالهائيندي چيو ته محتسب اعليٰ جو ادارو عوام کي فوري رليف ڏيڻ لاءِ سرگرم آهي ۽ ڪيترن ئي ماڻهن جا جائز مسئلا حل ٿي چڪا آهن. هن ٻڌايو ته جيڪو به شهري ڪنهن سرڪاري اداري خلاف شڪايت رکندو، اهو سادي ڪاغذ تي لکي آفيس ۾ جمع ڪرائي سگهي ٿو، جنهن جو تڪڙو حل ڪرايو ويندو. هن وڌيڪ چيو ته کلي ڪچهري جو مقصد ئي ڳوٺاڻن جا مسئلا ٻڌي لاڳاپيل کاتن کي هدايتون ڏيڻ آهي. ڳوٺاڻن ان موقعي تي شڪريو ادا ڪندي اميد ظاهر ڪئي ته سندن مسئلا جلد حل ڪيا ويندا۔