ڏوڪري ٽائون ڪميٽي جو چيئرمين عبدالحميد جيسر جي صدارت ۾ اجلاس

نوجوانن کي ٽيڪنيڪل سکيا ڏيڻ، سولر پليٽون ورھائڻ بابت ٺهراءُ پاس

ڏوڪري (رپورٽر) ڏوڪري ٽائون ڪميٽي جو اجلاس، چيئرمين عبدالحميد جيسر مٿان آفيس ۾ ٿيل قاتلاڻي حملي جي مذمت، جوابدارن کي گرفتار ڪرڻ، نوجوانن کي ٽيڪنيڪل سکيا ڏيڻ، سولر پليٽون ورھائڻ ۽ شھر مان منشيات ۽ ڏوھن جو خاتمي لاءِ يڪراءِ طور ٺھراءُ پاس ڪري ورتو. تفصيل موجب ڏوڪري ٽائون ڪميٽي جو اجلاس چيئرمين عبدالحميد جيسر جي صدارت ھيٺ ٿي گذريو ، جنھن ۾ وائيس چيئرمين سيف الله سومرو، ڪائونسلر حبيب الله کوکر، ڪاشف خاصخيلي، مونا فقير، پرھ ڍڪڻ، بشير ٿھيم، سھراب خاصخيلي ۽ ٻين شرڪت ڪئي. اجلاس ۾ ٽائون چيئرمين عبدالحميد جيسر مٿان آفيس ۾ ٿيل قاتلاڻي حملي جي مذمت ڪندي، ملوث جوابدارن کي بنا دير گرفتار ڪرڻ جي قرارداد پاس ڪئي وئي، جڏھن تہ ڏوڪري جي نوجوانن کي بجلي، سولر سسٽم سميت ٽيڪنيڪل سکيا ڏيڻ لاءِ سينٽر قائم ڪرڻ، سولر پليٽون ورھائڻ ۽ شھر مان منشيات ۽ ڏوھن جو خاتمي لاءِ يڪراءِ طور ٺھراءُ پاس ڪري ورتو. ان موقعي تي خطاب ڪندي چيئرمين عبدالحميد جيسر چيو ته ڏوڪري ٽائون جي نوجوانن کي منشيات جو عادي بڻائي سندن مستقبل تباھ ڪيو پيو وڃي، عوامي نمائنده ھئڻ جي ڪري اسين منشيات فروشي جي مخالفت ڪندي صوبائي گھرو وزير، آء جي سنڌ ۽ ڊي آء جي لاڙڪاڻو کان مطالبو ٿا ڪريون ته عوام جي آواز کي موٽ ڏيندي ڏوڪري شھر مان منشيات جو آزار ختم ڪيو وڃي. ھن چيو ته نوجوان کي بھتر مستقبل ڏيڻ لاءِ ٽائون ڪميٽي طرفان لائبريري ۽ فري ڪمپيوٽر سينٽر قائم ڪيو آهي، ھاڻي بجلي ۽ سولر سسٽم سميت ٽيڪنيڪل سکيا ڏيڻ لاءِ سينٽر قائم ڪنداسين جيئن نوجوان نسل پنھنجي مستقبل سنواري سگھي.