ملير جي خانگي فيڪٽري انتظاميه برطرف 50ملازمن کي بحال ڪرڻ کان انڪار ڪري ڇڏيو

پي ڪي ميٽ ڪمپني ملازم بحال ڪري سھولتون نه ڏنيون ته جدوجهد کي آخري حد تائين کڻي وينداسين: اڳواڻ

ملير(رپورٽ: عبدالرشيد مورجھريو) خانگي فيڪٽري مان برطرف 50ملازمن کي انتظاميا بحال ڪرڻ کان انڪار ڪري ڇڏيو متاثر ملازمن سوين ڳوٺاڻن سياسي سماجي اڳواڻ ۽ ڪارڪنن سان گڏ عوامي پريس ڪلب ملير اڳيان هڪ ڏينهن جي بک هڙتالي ڪيمپ قائم، صبح کان شام تائين مسلسل نعريبازي جيڪڏهن پي ڪي گوشت ڪمپني ملازم بحال ڪري سھولتون نه ڏنيون ته جدوجهد کي آخري حد تائين کڻي وينداسين جنهن جي زميوار خانگي ڪمپني انتظاميا تي هوندي پورهيت اڳواڻن جون صحافين سان ڳالھيون تفصيل موجب ملير ۾ ڌڻي پرتو موسي ڳوٺ لڳ قائم خانگي پي ڪي گوشت ڪمپني 25سالن کان ڪم ڪندڙ پورهيتن کي نوڪري مان جبري نيڪالي ڏني آھي جنهن خلاف متاثر پورهيتن جي احتجاجن باوجود انتظاميا پورهيتن کي بحال ڪرڻ کان انڪاري ڪري ڇڏيو آھي ان سلسلي ۾ گذريل ڏينهن متاثر پورهيتن سياسي سماجي اڳواڻ ڪارڪنن وڏي تعداد ۾ گڏ ٿي عوامي پريس ڪلب ملير اڳيان هڪ ڏينهن جي بک هڙتالي ڪيمپ قائم ڪئي جنهن ۾ شريڪ ماڻهن صبح کان شام تائين مسلسل نعريبازي ڪئي جنهن جي اڳواڻي اورنگزيب جوکيو جدوجهد ڪميٽي جا اڳواڻ اقبال ڪلمتي فيض سنڌي وهاب گبول شيراز سولنگي جيئي سنڌ تحريڪ جو آڪاش کٽي فدا جوکيو ساجد گوريلو امتياز جوکيو ۽ ٻيا ڪري رهيا هئا ان موقعي تي اڳواڻن صحافين سان ڳالهائندي چيو ته اسان جي ڳوٺن جي وچ ۾ پي ڪي گوشت ڪمپني قائم آھي پر فيڪٽري جو مالڪ طارق محمود بٽ ۽ ٺيڪيدار شاھد بهاري مقامي ماڻهن کان نفرت ڪري ٿو هنن فيڪٽري ۾ ڪم ڪندڙ 50کان وڌيڪ مقامي پورهيتن کي بنا ڪنهن سبب جي جبري نوڪرين مان نيڪالي ڏئي ڇڏي آھي جڏهن ته ٻين مقامي پورهيتن سان ڪمپنين اندر جانورن جھڙو سلوڪ ڪيو پيو وڃي هنن چيو ته جيڪڏهن فيڪٽري جو مالڪ ۽ ظالم ٺيڪيدار مقامي پورهيتن کي بحال نه ڪيو ۽ قانون موجب پگھارن ۾ واڌ ڪري ٻيون سھولتون نه ڏنيون ته متاثر پورهيتن سان گڏ ملير جا هزارين ڳوٺاڻا مجبور ٿي فيڪٽري جي مين گيٽ اڳيان مرڻ گھڙي تائين بک هڙتال ڪري فيڪٽري بند ڪري ڇڏيندا هنن سنڌ جي وڏي وزير پورهئي جي صوبائي وزير ليبر کاتي جي آفيسرن آئي جي سنڌ ايس ايس پي ملير ۽ ملير مان چونڊيل ميمبرن کي اپيل ڪئي ته ڄاڻايل ڪمپني انتظاميا خلاف انساني حقن جي ڀڇڪڙي سنڌ حڪومت جي قانون خلاف ڪم ڪندڙ فيڪٽري جي مالڪ ۽ ٺيڪيدار خلاف قانوني ڪاروائي ڪري بيدخل ڪيل پورهيتن کي بحال ڪرائي ليبر لا تحت سھولتون ڏنيون وڃن